The Definitive Guide to Living in the Capital , Cairo , Egypt

مطاعم
بوليفارد – Boulevard

بوليفارد: مطعم وكافيه الزمالك السابق غير مكانه لهليوبوليس

تم التقييم بواسطة
Sarah Kamel
قيم
قيم الآن
بوليفارد: مطعم وكافيه الزمالك السابق غير مكانه لهليوبوليس

بعد ما فتح في الزمالك وقفل بعدها بفترة بسيطة، مطعم "بوليفارد – Boulevard" حاول ينسى الماضي ويبدأ من جديد بفرعه الجديد في هليوبوليس بمنيو معدّلة وتطوير واضح في الخدمة وجودة الأكل، وسط شوارع هليوبوليس، بوليفارد اختاروا مكان هادئ في واحد من الشوارع الجانبية عند تيفولي، وهناك عملوا قعدة آوت دور تتميز بالخضرة، والمطعم نفسه بـ يطل بالكامل على الحديقة والشوارع الهادئة بفضل واجهته اللي كلها من الزجاج.

طلعنا في زيارة للمكان بالليل متأخر، بس ده ما قدرش يمنعنا نطلب أكلات مقلية متعددة، والبداية كانت مع المقبلات، وتحديدًا طبق تريبل بلاتر (54.99 جنيه) وهو عبارة عن موتزاريلا ستيكس مقلية وتشيكن ستريبس مقلية برضه وكمان سمك مقلي مع صوص مارينارا وعسل ومسطردة وكاتشب، وطبعًا مايونيز، كل حاجة في الطبق كانت مقلية صح، والموتزاريلا ستيكس كانت مقرمشة والجبن فيها سايح ولذيذ، بعد شوية قدرنا نفرّق بين السمك المقلي والتشيكن ستريبس، والحقيقة أن السمك فاجئنا بتتبيلته المضبوطة والتوازن بين الملح والفلفل، وكمان الشطّة اللي أضافت لذعة مميزة لطعم السمك، بالنسبة للفراخ كانت معقولة جدًا، مقلية صح ومقرمشة من بره وطرية ومستوية كويس من جوه.

بعدها طلعنا على الأطباق الرئيسية، وطلبنا منها تشيكن ميلانو (68.99 جنيه) ودي عبارة عن فراخ مقلية وعليها جبنة موتزاريلا سايحة ومحشية رومي مدخن، كوكتيل المكونات كان طعمه هايل، بس كان محتاج قطعة رومي أو اثنين زيادة.

قررنا نجرب طبق تشيكن تاكي أند تاماريند ميت Chicken Taki & Tamarind Meat بناء على توصية من الجرسون، وده واحد من مجموعة أطباق المفروض تنزل في المنيو قريب، عبارة عن فراخ فيليه مشوية وقطعة لحم متوسطة الحجم ومعاهم مكرونة بنّا بالصوص الأبيض؛ المكرونة كانت مستوية تمام بس ناقصها التتبيلة، بالنسبة للأكل نفسه، فصوص التمر أكيد أضاف نكهة مختلفة لقطعة اللحم بس الفكرة أنها كانت مستويةّ بزيادة وصعبة المضع، أما الفراخ –اللي حجمها أصغر بالمقارنة مع قطعة اللحم– فكانت مستوية تمام، بس الفكرة أن صوص التاكي كان قليل أو ناقصه النكهة المطلوبة.

من أيام فرعهم في الزمالك وهم بـ يتكلموا دائمًا عن كوكتيلاتهم، فقررنا وإحنا في انتظار قطعة البراوني نطلب بينك ليموناد  Pink Lemonadeبـ (24.99 جنيه) وباينابل كوولر ليموناد  Pineapple Cooler Lemonadeبـ (24.99 جنيه)، وصل بعد شوية لترابيزتنا برطمانين كل واحد منهم نصف لتر، والاثنين للأسف مش على المستوى، الأول كان حادق جدًا، أما الثاني فكمية البلو كيوراساو blue Curacao كانت زيادة عن اللزوم.

لحسن الحظ أن نهاية اليوم كانت كويسة، والفضل يرجع للبراوني شوكولاتة السخنة (32.99 جنيه)، اللي معاها بولة آيس كريم فانيليا وصوص شوكولاتة، وهي نفسها كانت لذيذة وسكّرها معقول.

أكيد بوليفارد تطور بشكل ملحوظ عن أيام الزمالك بكميات أكل مناسبة ووقت تقديم طلبات معقول ومكان هادئ وموظفين ممتازين، ينقصه بس حاجة تميزه عن الباقيين.

نصيحة 360

بوليفارد بـ يقدم منيو فطار من 9 صباحًا لغاية 1 ظهرًا، تابع صفحتهم على الفيسبوك علشان تعرف أكثر.

أحسن حاجة

موظفين هايلين وكميات أكل كافية.

أسوأ حاجة

مافيش حاجة نقول عليها "روعة"، كل حاجة هناك متوقعة والأصناف الجديدة لسه شوية على ما تنزل في المنيو.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح