The Definitive Guide to Living in the Capital , Cairo , Egypt

بـ نلاقي مطاعم كثير بـ تحاول تقلد تتبيلة الفراخ المشهورة "كنتاكي" في القاهرة، واللي أغلبهم بـ يفشل للأسف، تشكين دوت كورن – chicken dot corn من المطاعم دي، علشان كده ما تنخدعوش بمظهر المطعم أبدًا لحد ما تذوقوا بنفسكم.

لما دخلنا المطعم اللي في Nile blue blue، والحقيقة أنه كان فرصة كويسة أننا نكتشف أكثر من مكان جديد هـ نكتب لكم عنهم في الفترة الجاية إن شاء الله، المكان حلو وكبير على نافورة في وسط المكان، الأضواء بالليل جميلة عليها جدًا، وشكل الفلاير يخليك تحس أنك هـ تأكل أجمل دجاج في حياتك.

المنيو معتمد على طلب الوجبات العائلية، وبجانبها فيه ساندويتشات مختلفة، وأرز بالخضروات والدجاج وسلاطات. فطلبنا وجبة لانش اللي مكونة من 4 قطع من الدجاج المقرمش وسلاطة الدرزل والصوص المميز مع الخبز والبطاطس بـ 28 جنيه، وchicken wrap اسمه سموكد تورنيدو بـ 21 جنيه، مكون من قطع الدجاج المقرمش مع الجبنة الشيدر وشرائح الديك الرومي المدخن في خبز التورتيلا مع الخضروات.

أول ما الأكل وصل الحقيقة كان سخن جدًا وإحنا كنا جعانين قوى، لكن أول ما بصينا على حجم الفراخ صُدمنا صدمتنا الأولى، هم المفروض 4 قطع 2 منهم دبوس بحجم عقلة الأصبع وجناح أكبر من عقلة الأصبع بحاجة بسيطة، والباقي برضه كان وراك الدجاجة أما الصدر فتقريبًا هم ما سمعوش عنه قبل كده ولا عن حجمه. نيجي بقى للصدمة الكبرى التتبيلة، يا ترى إيه إحساسك وأنت جعان، ورائحة الأكل في مناخيرك وبـ تأكل أول قضمة، تلاقي طعمها استغفر الله العظيم يا رب جبس، أو محروق، يعني هي من كثر ما كانت ناشفة جدًا ومن غير طعم مش عارفين نوصفها الحقيقة، أما الصوص المميز اللي كانوا بـ يقولوا عليه، فده اختراع جديد جدًا لسه نازل في السوق اسمه كاتشب، ياه تخيلوا! فبما أن الجيش قال لك اتصرف، شيلنا الجلد اللي فيه النكهة وأكلنا الدجاج بس، اللي كان مليان دهون مش عارفين إزاي.

ده غير أن مع أول قضمة جاءت قطة تشاركنا الطعام، اللي استمتعت به جدًا خاصة أنها كانت من نوع القطط اللي بـ يطلع فوق الترابيزة مش بـ ينونو بأدب تحت.

المهم بعد التجربة الأليمة دي قلنا نجرب الساندويتش والحمد لله طعمه كان حلو، برغم أن التتبيلة كانت قليلة برضه، بس ده اللي عرفنا نأكله.

الحاجة الوحيدة اللي نقدر نقول أنها كانت حلوة، هي التشيز كيك بالبلوبيري بـ 11 جنيه، لأنها كانت خفيفة ومنعشة، وجاهزة عندهم في الثلاجة.