The Definitive Guide to Living in the Capital , Cairo , Egypt

مطاعم

جوائز اختيارات المحررين لأفضل أماكن بـ تقدم أكلات صحية لعام 2015

جوائز اختيارات المحررين لأفضل أماكن بـ تقدم أكلات صحية لعام 2015
بواسطة
Cairo 360

في مدينة زي القاهرة – أهلها بـ يحبوا الأكلات الدسمة، ومش بس كده، كمان لازم يحلًوا بعدها- صعب أنك تعمل دعاية لأماكن بـ تقدم أكلات صحية؛ لأن كثير من الناس عندها قناعة تامة أن الأكلات الصحية لا طعمها حلو ولا بـ تشبع، ده غير أنك علشان توضح للناس أهمية اتباع نظام غذائي صحي -علشان تبني عندهم خلفية على أساسها يختاروا أماكن بـ تقدم أكل صحي- عملية متعبة وغير مجدية اقتصاديًا.

 بـ نقدم جوائز أفضل أماكن بـ تقدم أكلات صحية للأماكن اللي قدرت أنها تحقق المعادلة الصعبة: أكلة صحية وفي نفس الوقت لذيذة ومشبعة، ده غير أنهم قدروا يسهلوا بمنتجاتهم الطريق لكثير من الناس أنهم يتبعوا عادات صحية أكثر.

الفائزين بجوائز اختيارات المحررين لعام 2015 لأفضل أماكن بـ تقدم أكلات صحية هم:

 

ليتشي – Lychee:

من أول الأماكن اللي قدرت أنها تحقق نجاح بمجموعة المشروبات الصحية والعصائر الفريش المختلفة اللي بـ يقدموها، سواء عصائرهم الفريش المغذية أو اللي معمولة مخصوص لإخراج السموم من الجسم (الديتوكس)، ليتشي بـ يضمن لك مشروب مفيد ولذيذ من غير ما تحس بالذنب بعده، ده غير أنك ممكن تعمل كوكتيلك المفضل هناك بأربعة مكونات مختلفة من اختيارك.

 

لوجوز – Lujo’s:

مين قال أن الأكل الصحي طعمه مش حلو؟.. مطعم لوجوز بـ يقدم مفهوم جديد للأكل الصحي، لأنه متخصص في عمل الأكلات المشهورة في مطاعم الوجبات السريعة –زي البيتزا- ولكن بمكونات جورميه، صحية وبكمية أقل من الدهون، وفوق كل ده أسعاره مش مبالغ فيها؛ فبالتالي وأنت بـ تأكل من لوجوز، مش هـ تخاف لا على وزنك ولا على جيبك.

 

ذا فيجان كيتشين – The Vegan Kitchen:

أنك تكون نباتي في القاهرة دي حاجة مش سهلة بس ممكنة، إنما أنك تكون فيجان (يعني بـ تأكل أكل نباتي عضوي بس، مافيهوش أي بروتين حيواني) فدي حاجة ثانية خالص، وتقريبًا كانت شبه مستحيلة لحد ما فتح ذا فيجان كيتشن في القاهرة، المكان مش بس بـ يقدم الوجبات النباتية المعروفة في العالم وخلاص، ده كمان بـ يقدم وجبات من ابتكاره؛ خلتنا كغير نباتيين نقدر الأكل النباتي، جربوا التوفو ستيك هناك، هـ يغير مفاهيم كثيرة عندكم عن الأكل النباتي!  

 

ساتفا ستيبس – Sattva Steps:

بالرغم من أن الموضوع ممكن يبقى صعب على ناس كثير أنهم يختاروا من منيو مقسم حسب عدد السعرات الحرارية الموجودة في كل وجبة، إلا أن ساتفا ستيبس مش بـ يعد عليك السعرات الحرارية علشان يحسسك بالذنب وخلاص، ده كمان حاسب لك عدد الخطوات اللي ممكن تمشيها علشان تحرق الوجبة اللي اختارتها… ده ناقص كمان يمشيها لك! ساتفا ستيبس مش بس سهلت الموضوع لكل اللي بـ يحاولوا يحافظوا على وزنهم بحساب عدد الخطوات، ده كمان بـ تقدم أكلات صحية وشهية في نفس الوقت. 

 

جود كالز – :GoodCals

إحساس جميل جدًا لما تأكل أكل صحي طعمه حلو، وتبقى كل مكوناته فريش ولذيذة، جود كالز بـ يقدم مجموعة مميزة من السلاطات والساندويتشات اللي هـ تشبعك من غير ما تحس بالذنب بعدها، وده يخليه منافس قوي أمام مطاعم الوجبات السريعة اللي بـ نطلبها كل يوم وإحنا قاعدين في المكتب.

مقترح