The Definitive Guide to Living in the Capital , Cairo , Egypt

فطائر الكريب الفرنسية من الأكلات اللي تعتبر حديثة شوية على مطاعم القاهرة وكان اكتشافنا لها أيام الجامعة بأنواعها الحلو والحادق، فطائر الكريب هي اختراع فرنسي 100% من ابتكار شاب فرنسي اسمه هنري شاربنتي افتكسها في سنة 1895 في إقليم بريتاني في فرنسا، انتشر الكريب في كل انحاء أوربا وأخيرًا وصلت للوطن العربي ولاقت نجاح قوي لدرجة أننا من 6 سنين كنا بـ نتكعبل في مطاعم الكريب زي محلات الأكل السوري حاليًا، لكن شعبية الكريب بدأت تتراجع وده أثر على عدد محلات الكريب اللي بقت أقل من الأول وصعب لما تلاقي محل بـ يقدم كريب كويس، موضوعنا النهاردة عن “حمزة جريل” اللي رشحه لنا أصحابنا وقالوا “عنده كريب كويس”.

في 4أ عمارات الشرق التأمين أمام البوابة الرئيسية للحديقة الدولية هـ تلاقوا محل حمزة اللي عبارة عن مكان صغير قوي فيه الكاشير ومطبخ عمل الكريب وعلى جانب المساحة الصغيرة دي شواية للمشويات اللي بـ يقدمها المكان وكمان ثلاجة كبيرة للحلويات والمشروبات.

“أنتم شغالين؟” سألنا بصوت عالي اللي كان واقف على المحل الهادي الفاضي وكأن المحل قافل أو إحنا وصلنا متأخر، “طبعًا شغالين اتفضلوا” بدأنا نحدد ملامح مقالنا النقدي بالاستقبال الجامد ده، الأمل في الأكل، ما كانش فيه إلا قائمتين طعام مكرمشين وعليهم أثار زيت، اختارنا أقلهم ضرر، المنيو مُقسم إلى مشويات ودي بـ تتحسب بالكيلو بجانب الصواني اللي بـ تبقى عبارة عن أرز بسمتي مع كمية من الكفتة أو الفراخ أو الكبدة أو السجق الإسكندراني، كمان الأطباق بأنواعها المختلفة مع الأرز البسمتي وساندويتشات الكبدة والسجق والحواوشي، وأخيرًا قائمة الكريب اللي اختارنا منها فرينش كريب (16 جنيه) وكريب فاهيتا لحم (14 جنيه) وللتحلية اختارنا كريب نوتيلا (10 جنيه)، بعد 10 دقائق لاقينا قطط عمالة تعدي تشوف الأكل نزل ولا لسة وكأنها عاوز تقول “هي الناس دي هـ تأكل امتى”، لكن القطط لو كانت انتظرت شوية كمان كان الأكل هـ يوصل، وصل الطلبين كانوا سخنين قوي لدرجة أننا سبناهم شوية علشان يبردوا، كانوا مُقدمين في طبق فويل وملفوف بورق ومن داخلهم كيس نايلون “نايلون والسخونية don’t mix”، الفرينش كان عبارة عن فطيرة كريب رقيقة مقرمشة وطازجة وبداخلها قطع فراخ بانية عليها جبنة شيدر مع كاتشب وفلفل حار وقطع لانشون فراخ “بس ما كانش فيه هوت دوج زي ما المينو بـ تقول” طعمها كان يجنن مع الكريب المقرمش لكن كانت حارة شوية بس تمام، أما كريب الفاهيتا فطيرة الكريب كانت سميكة شوية وكمان شوية مزيتة مش جافة زي الفرينش وبداخلها فاهيتها لحم مع جبنة موتزاريلا مع تتبيلة الفاهيتا المعروفة لكن الطعم ما كانش قوي، خلال استمتاعنا بالكريبين الكويسين وصل كريب النوتيلا، ودي كانت عادية عجينة كريب رقيقة ومقرمشة وطازجة مع كمية كويسة من النوتيلا جواها.

بالرغم من الحرارة والقطط قضينا يوم لطيف في حمزة، لكن ما نقدرش نقول أن المحل خدمته مش قد كده لكن أغلب الطلبات اللي عنده بـ تبقى دليفري ودي بـ يفسر سبب الروقان اللي كان في المحل، جربوا حمزة سواء كان دليفري أو في المحل وقولوا لنا تجربتكم كانت عاملة إزاي.