The Definitive Guide to Living in the Capital , Cairo , Egypt

مطاعم
دايت تو دوور – Diet to Door

دايت تو دور: أكل ريجيم كامل لحد البيت في المعادي

  • توصيل فقط
  • مصري
  • 9 صباحًا - 6 مساءً -
تم التقييم بواسطة
Nagla Ashraf
قيم
قيم الآن
دايت تو دور: أكل ريجيم كامل لحد البيت في المعادي

في الفترة الأخيرة انتشرت فكرة مطاعم الريجيم في القاهرة والأكل الصحي، لكن الجديد النهارده، أن المكان ده بـ يوفر لك جدول غذائي متكامل بإشراف طبيب، ويوصل لك الأكل لحد البيت، صحيح لنا بعض المآخذ بس الفكرة في حد ذاتها تستحق التشجيع.

لازم تنبسط وتتشجع جدًا لوجود مكان بـ يشجعك بالصورة دي، بس يا ترى هل الأكل طعمه حلو؟ هل الأسعار مناسبة؟ هل هـ يجيب نتيجة؟

كل الأسئلة دي كانت في دماغنا أول ما سمعنا عن "دايت تو دور – Diet to door"، واللي جاوبتنا عليها موظفة الاستقبال في التليفون، مبدئيًا أنت لازم تملأ استمار باسمك وعنوانك ووزنك وطولك على الموقع الإلكتروني بتاعهم، وبـ تمشي على النظام الغذائي اللي برضه حاطين الجدول بتاعه على الموقع، الجداول الموضوعة لأربعة أسابيع متتالية، بس أنت مش بـ تمشي لوحدك من أول أسبوع، لأ أنت بـ تمشي بالأسبوع اللي هم فيه الثاني أو الثالث وكله بالجدول، وده اكتشفناه الحقيقة بعد ما طلبنا الطلب، كمان لما بـ تملأ الاستمارة يوم الأحد مثلًا، يبدأ الأكل ييجي لك من يوم الاثنين، وللأسف الأكل كله بـ يتعمل في وقت واحد وييجي لك في نفس الوقت كل يوم على الساعة 5:30 أو 6 حسب منطقتك السكنية ما ينفعش بعد أو قبل، والأكل بـ يكون عبارة عن وجبات اليوم كلها من أول الفطار للعشاء وفيه في النصف وجبات خفيفة، والمفروض أن النظام الغذائي ده بـ يخسسك من 2 لـ 3 كيلو في الأسبوع.

أما عن الماديات فاليوم الواحد حضرتك بـ 120 جنيه أي نعم، وما ينفعش تشترك بأقل من 20 يوم أو أسبوع كأقل تقدير وممكن لو هـ تشترك بالشهر يعملوا لك خصم 5%، بس الحمد لله ممكن تجرب يوم لو ما عجبكش ما تكملش، وده اللي عملناه الحقيقة علشان نقدر ننقل لكم كافة التفاصيل.

نبدأ بالجدول، هو كان معتمد على فكرة أنك تأكل أكثر من حاجة على فترات متقطعة بس بكمية قليلة، ومن غير حرمان يعني ممكن تأكل كل اللي أنت عاوزه وتخس، كل أنواع الأكل من بيتزا ومكرونة ومحشي، وده شيء مغري جدًا الحقيقة بس لو كان طعمه حلو.

اليوم اللي إحنا اختارناه كان فيه فول وعيش سن كفطار، وبعدين محشي وقطعة صدور فراخ كغداء، وكعشاء سلاطة سيزر وسناك تفاحة وسلاطة وسناك ثاني مهلبية بالجيلي وكله بما يرضى الله، كمان بـ يقدموا أكثر من نوع سلاطة لو عاوز تطلب حاجة زيادة.

ما تتخضوش من كلمة محشي في الدايت إطلاقًا لأن اللي جاء لنا يا دوبك واخد اللقب بس، الأكل جاء الساعة 5:30 زي ما قالوا لنا وده لأننا ساكنين في المعادي قريب منهم، وأول حاجة قلنا نجربها علشان جعانين كانت المحشي، وجبة الغداء بقى، وكان عبارة عن 5 محشيات كوسة وأربعة محشيات باذنجان وطماطماية محشية، العدد كبير ولكن الحجم صغير، مش دايت بقى، ومع أول قضمة بانت الحكاية، الخلطة عبارة عن أرز بسمتي مسلوق تقريبًا مع رشة طماطم ومافيش أي طعم إطلاقًا، ولا بهارات ولا أي شيء مطلقًا، وبرغم أننا مقدرين جرأتهم إلا أن حبة صلصة حمراء من غير دهون وتوابل ما كانتش هـ تأثر في حجم السعرات بس هتأثر في مزاجنا في الأكل والطعم، وحجم قطعة الفراخ كان صغير جدًا، يعني كنا ممكن نقبل أنه يقلل قطع المحشي ويزود في الفراخ كان هـ يبقى أوقع.

زي ما قلنا هم كمياتهم قليلة جدًا، لأن عدد الوجبات أكثر في اليوم، يعني طبق الفول كان فعليًا في علبة بلاستيك بتاعة صوص السلاطة دي اللي حجمها قد نصف كف الأيد كده، وجنبهم ربع رغيف وجرجير، السلاطة كمان كان حجمها صغير جدًا، والتحفة الفنية كانت سلاطة السيزر وده راجع للصوص طبعًا في المقام الأول أكثر من تتبيلة الفراخ، للأسف برضه المهلبية ما كانش لها أي طعم إطلاقًا، ومعلقة الجيلي اللي فوقها هي اللي كانت معقولة.

طيب بالنسبة لتنظيمهم وتغليفهم للوجبات؟.. كان هائل، الأكل كله بـ ييجي مغلف على حدة في علب بلاستيك وكله في كرتونة كبيرة للحفاظ عليه، بس بالمقارنة مع الأسعار وجودة الأكل الحقيقة أن الموضوع مش مستاهل، يعنى ممكن نجربه يوم من باب أننا اتزنقنا في الريجيم وما لحقناش نعمل أكل بس حتى ده مش متوفر عندهم لأنك لازم تحجز من قبلها والأكل ييجي لك ثاني يوم زي ما قلنا.

كانت تجربة لطيفة عامة، نتمنى أنهم يصلحوا المشاكل البسيطة دي ويوفروا اختيارات متعددة لزبائنهم.

نصيحة 360

كل المعلومات هـ تلاقوها على الموقع بتاعهم.

أحسن حاجة

سلاطة السيزر.

أسوأ حاجة

عدم وجود نكهة لأغلب الأكل والأسعار مبالغ فيها.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح