The Definitive Guide to Living in the Capital , Cairo , Egypt

كثير من الناس بدأوا يتجهوا للأكل الصحي في الفترة الأخيرة واللي سعراته الحرارية قليلة، وده أدى لانتشار مطاعم الأكل الصحي والسلاطات اللي كلها بـ تتنافس في الطعم والجودة والسعر، لكن مش كل الناس بـ تقدم أكل مفيد بجودة عالية وأسعار معقولة زي سلاد فييستا – Salad Fiesta.

المكان في الفوود كورت في الدور الأرضي لسيتي ستارز، وده آخر مكان كنا نتوقع نلاقي فيه حد بـ يهتم بالصحة أو الأكل المفيد، بطبيعة المكان مافيش أمامك إلا ثلاجة شفافة معروض فيها مكونات السلاطة بتاعتك واللي هي ما بين بروتين: دجاج مشوي أو مقلي بالباربكيو، سلامون مدخن، تونة، تركي، بيكون، وما بين أنواع الخضروات العادية زي الخيار والطماطم والذرة والفلفل والزيتون، وطبعًا ما نقدرش ننسى أنواع الجبن: لو حبيت تضيفها: جبنة موتزاريلا ورومي وفلامنك، كمان هم بـ يقدموا كوبايات فيها فاكهة ما بين رمان ومانجو وفراولة، وكل أنواع العصائر الطبيعية اللي تتخيلوها.

أنت اللى بـ تعمل وجبتك، يعنى حضرتك اللي بـ تكون طبقك بنفسك، وخلونا نعرفكم بالنظام عندهم: أولًا أنت بـ تختار حجم طبقك: الحجم الصغير (25 جنيه)، والكبير (35 جنيه)، وبعدين تختار المكون الرئيسي والإضافات، وفيه إضافات معينة بـ تبقى بـ 5 جنيه زي الطماطم الشيري، والرمان، الحجم الصغير بـ يبقى فيه نوع بروتين واحد و4 إضافات خضار، والحجم الكبير 2 نوع بروتين و8 إضافات، والمكون الأساسي بـ تختاره ما بين مكرونة أو خس.

طلبنا طبقين سلاطة حجم صغير (25 جنيه)، وكوباية فاكهة رمان ومانجو (30 جنيه)، وكوكتيل ليمون بنعناع ببرتقال وكيوي بـ 22 جنيه، أول طبق سلاطة عملناه، كان المكون الأساسي فيه الخس، وزودنا جرجير وجزر وكابوتشى ومشروم وطماطم شيري ورمان وجبنة فلامنك ومشروم، ودجاج مشوي، وعليها صوص Honey Mustard، طعم المكونات مع بعضها كان رائع وتركيبة الحلو مع الحادق عجبتنا جدًا لأننا بـ نحب نعمل ده قوي في كل حاجة تقريبًا، وفعلًا مافيش مكون نقدر نقول عليه كان وحش أو مش طازة، السلاطة الثانية المكون الرئيسي فيها كان مكرونة، وزودنا عليها فاصوليا خضراء (كانت نية شوية) ومشروم وفلفل ألوان ونوعين جبنة فلامنك وموتزاريلا وصوص Thousand Island، وبرضه كانت حلوة جدًا وإن كنا حبينا التركيبة اللي عملناها في الأول أكثر، كوباية الفاكهة ما كانتش طازة قوي زي الخضروات، وممكن يكون ده سوء تخزين، أما العصير فـ اتعمل أمامنا وكان طعمه رائع ومنعش.

سلاد فييستا مطعم بـ يقدم لك أكل يساعدك تحافظ على صحتك، وبـ يساعدك تمارس الدايت بتاعك من غير ضغوط، وكمان فيه كل الاختيارات اللي تحبها.