The Definitive Guide to Living in the Capital , Cairo , Egypt

حاولنا ندوَّر على عبارات محايدة أو أقل حماسة نبدأ بها المقال ده، لكن لاقينا نفسنا عاوزين نصرخ ونقول: “ده أحسن أكل أكلناه في حياتنا”. الموضوع مافيهوش مبالغة، مطعم «شيفز ماركت – Chef’s Market» بـ يخليك تعيش تجربة فريدة في عالم الطعم والمذاق، ناهيك عن الخدمة المحترفة وشكل المكان غير التقليدي، السطور اللي جاية هـ تشرح مراحل انبهارنا بالساعتين اللي قضيناهم في أحدث مطاعم عاصمة القاهرة.. سيتي ستارز.

أولًا لازم نعرف حضراتكم أن صاحب المطعم هو الشيف الدكتور وسام مسعود، اللي بـ يقدم برنامج «مطبخ 101» على قناة cbc سفرة، نعتقد ده بـ يفسر حاجات كثير، وأهمها أن العبقرية هنا مرتبطة بالمذاق في المقام الأول، أنت مش هـ تحس أنك داخل مطعم عادي، تأكل شوية وتشرب حاجة وتتابع التليفزيون وتلعب في الموبايل شوية وتمشي، لأ الحقيقة أنت هـ تشعر وكأنك في لجنة تحكيم في مسابقة طبخ، وأن الشيفات بـ يتفننوا في أنهم يبهروك بالوصفات والأطباق الغريبة واللذيذة، كل طبق فعلًا بـ ينزل أمامك بـ يبقى حكاية في حد ذاته، وهـ تلاقي المنيو بـ يشرح مكوناته بالتفصيل، ده غير جزء المعلومات بين كل صفحة والثانية في المنيو عن كل مكونات الأكلات والفرق بين أنواع اللحوم والتوابل والخضروات، يعني حتى المنيو غير عادي، ويغريك أنك تقعد تقرأ فيه زي الكتاب.

المكان واسع وفيه 3 أماكن للجلوس كل منها مستقل بذاته، لكن كلهم بـ يبقى شايف المطبخ المفتوح اللي الشيفات بـ يشتغلوا فيه، وممكن تقوم بنفسك تتفرج على الطبق بتاعك وهو بـ يجهز، وتشوف الأجهزة والمعدات العجيبة اللي بـ يستخدموها في التقطيع والتسوية اللي تعتبر مبهمة تمامًا بالنسبة لنا، ودي كمان حاجة جديدة مش بـ نلاقيها في مطعم في مصر.  

عجبنا كمان أن الأكلات مش كثير قوي في المنيو، أطباق محددة من اللحوم والدجاج والأسماك مع بعض أنواع السلاطات والمقبلات، ونوع واحد أو نوعين من الحلويات وعصائر فريش ومشروبات ساخنة. لكن كل طبق مشروح تحت اسمه المكونات بتاعته بالتفصيل، وكأنك بـ تتفرج على برنامج طبخ تليفزيوني، ومع حقيقة أنك ممكن تقوم تتفرج عليه فعلًا وهو بـ يتعمل، فأنت هنا بـ تحقق حلمك أنك تأكل “طبق اليوم” اللي طول عمرك بـ تشوفه على الشاشات وبس.

وإحنا بـ نتكلم عن الأطباق اللي طلبناها مش محتاجين نقول كل شوية قد إيه هي كانت روعة وخرافة لأن كل حاجة جربناها بجد كانت كده، هـ نشرح مكونات الأطباق بس ونسيب الباقي لخيالكم. جربنا طبق سلاطة الرنجة والجمبري والبنجر (48 جنيه) ودي بـ تتقدم في طبق عميق مليان مكعبات صغيرة جدًا من البنجر والخيار والرنجة، و3 حبات جمبري فريش، وطبقات الخس بـ تحيط بالطبق كله، ومعاها دريسنج الليمون المخفف. ومن ضمن أطباق اللحوم اختارنا بيف التندرلوين (96 جنيه) وهو قطع لحم بقري بلدي مستوي على الآخر لدرجة أنه بـ يدوب زي المارشميللو في الفم، ومغطى بطبقة من البيكون البقري والبصل المكرمل، وبـ يُقدم معاه سبانخ سوتيه بوحدات الحمص الفريش وبطاطس مخبوزة طرية وطماطم مخللة رهيبة، ومعاه دريسنج خاص به من الليمون والتوابل المختلفة. طبق رئيسي ثاني من لحم البط المحمر والفريك اسمه تيرين البط أو Duck Terrine بـ (70 جنيه)، وفيه بـ يكون البط مقطع شرائح ومحمر من غير ما يكون ملسوع أو مقرمش، طريقة غريبة في التسوية لكن عجبتنا جدًا، والفريك غرقان في البهارات العجيبة والشوربة، ورغم أن إحنا مش من هواة أكل البط ولا الفريك، لكن الطبق ده كان من ترشيحات الويتر وعجبنا أكثر مما كنا نتخيل. وما تنسوش أن الصبح فيه منيو متخصص للإفطار، وأن العيش المخبوز هنا واللي بـ يُقدم كتحية أول لما تقعد كان خيالي زي كل حاجة اتحطت أمامنا على الترابيزة من أول القعدة لآخرها.

مجاملة لطيفة من «شيفز ماركت» وهي طبق الحلو هدية من عندهم بعد ما طلبنا وجبتنا الرئيسية، وكان عبارة عن كأس فيه كنافة مفتتة على طبقة من الكاسترد ومغطاة بالقرفة والزبيب، الطبق ده لوحده يخلي الناس تيجي للمطعم هنا من آخر الدنيا. اختتمنا وجبتنا بعصير يوسفي فريش (21 جنيه) بعد ما شوفنا رصة الفاكهة والخضار اللي شكلهم يفتح النفس في واجهة المطعم، وبكده نكون أنهينا واحدة من أجمل تجاربنا في مطاعم العاصمة، وشكرنا كل فرد قام على خدمتنا في الوقت اللي قضيناه هناك، ومش محتاجين نقول لكم أنكم ما ينفعش يعدي أسبوع كمان من غير ما تجربوا أكل «شيفز ماركت».