The Definitive Guide to Living in the Capital , Cairo , Egypt

مطاعم

شيكو ع الناصية.. بانيه وحواوشي على كيفك في الهرم‎

بانيه حواوشي شواية شيكو صوص مخلل موتزاريلا ناصية
شيكو ع الناصية.. بانيه وحواوشي على كيفك في الهرم‎
بواسطة
Mohamed Talaat

سمعنا عن شخص اسمه شيكو في الهرم بيعمل أكل حلو، وطبعًا إحنا في كايرو 360 بنجري على أي مكان فيه أكل جديد، علشان ننقل لكم تجربتنا معاه. رحنا له بالفعل في مكانه، وعنوانه 11 شارع سهل حمزة، بين فيصل والهرم – أمام سوبر ماركت “كازيون”.

وصلنا ولقيناه شخص لوحده بيشوي حواوشي على الفحم. طبعًا ريقنا جري وطلبنا حواوشي على الفحم بالجبنة (30 جنيه). الجديد بقى أن الحواوشي بيتحط عليه الجبنة الموتزاريلا من فوق، وللأسف هي مكنتش بالجودة اللي تدي طعم مميز للحواوشي. كمان طلبنا حواوشي عادي صغير (15 جنيه). وكان طعم اللحمة مختلف. ولما سألناه اللحمة دي طعمها غريب علينا، قال أن دي لحمة جملي من الجزار، وبيضيف عليها دهن خروف، علشان يتميز بالطعم. ونحب نقول له تسلم إيديك يا شيكو.

دخلنا بعد كده في مرحلة الساندوتشات، وطلبنا سندوتش بانيه مشوي (25 جنيه). الحقيقة الشكل بتاع البانيه وهو خارج من العلبة، وبيتحط على الشواية خلى نفسنا تتفتح. وخلانا نطلب واحد بخضروات وواحد سادة. الطعم مميز جدًا، حتى وهو بارد. طلبنا شيش طاووق (30 جنيه). اللي بيتشوي وينزل في الساندوتش بسيخ مش زي العربيات التانية اللي بتشوحه. نزل لنا سادة على حسب طلبنا. وحقيقي أكلناه حاف من حلاوته.

ولما نفسنا اتفتحت قررنا نجرب الهوت دوج (15 جنيه). وللأسف هو كان جاهز فبالتالي كان عادي بالنسبة لينا مفيهوش حاجة مميزة. والسجق البلدي (15 جنيه)، للأسف كان سيء جدًا وقفلنا الأكلة. حتى إحنا مكملناش أكل.

الجميل في شيكو ع الناصية، إنك تقدر تختار من 6 أنواع صوص مختلفة، وكلهم ببلاش. وكمان بينزل لك مخلل ببلاش، وطعمه حلو بيفتح النفس. لكن خلي بالك إن مفيش مكان تغسل إيديك. ودي صفحته على فيسبوك.

مقترح