The Definitive Guide to Living in the Capital , Cairo , Egypt

طرطوس

طرطوس: شاورما بمواصفات قياسية في مصر الجديدة

  • 105 شارع النزهة
  • سوري
  • 19914
تم التقييم بواسطة
Waleed Abuarab
قيم
قيم الآن
طرطوس: شاورما بمواصفات قياسية في مصر الجديدة

من شهور مش كثيرة ظهر فرد جديد في عائلة مطاعم مميزة ومعروفة وهي «بافلو برجر» و«روما بيتزا» ولكن العضو الجديد من العائلة تخصص في الشاورما والساندويتشات الشامية وأطلق على نفسه اسم «طرطوس». الاسم المميز اللي على اسم أحد أهم المدن الساحلية السورية، والأجمل من الاسم هو اللوجو أو شعار المحل اللي هـ نسيبكم تشوفوه بنفسكم بس هو عجبنا جدًا لأنه مالوش أي علاقة لا بالاسم ولا بنوع المطعم ولا بالأكل اللي بـ يقدمه. روحنا فرع «طرطوس» اللي في ميدان تريومف في مصر الجديدة وهـ نقول لكم حالًا عن تجربتنا.

المطعم صغير الحجم فيه 3 ترابيزات فقط داخل المحل وكام قعدة كدة برة قدام المحل، المقصود من المطعم مش القعدة والأكل أكثر ما هو مقصود به التيك آواي “اللي شغال ما شاء الله طول ما إحنا موجودين” والدليـڤري لكل المناطق المحيطة. ومع ذلك المكان أنيق والقعدة فيه بسيطة ومريحة، هـ تروح تعمل الأوردر بتاعك على الكشير وبعد شوية بـ يتم النداء على الرقم بـ تروح تستلم صينيتك اللي عليها ما لذ وطاب من الشاورما والثومية وغيره.

ساندويتشات العيش الصاج والشامي اللبناني وعيش التورتيا، بحجمين وسط وكبير وبأسعار من 13 جنيه لحد 20 جنيه، وممكن تضيف 8 جنيه على أي ساندويتش وتخليه كومبو. وممكن تجيب وجبة لفردين بـ 49 جنيه فيها 4/1 كيلو شاورما وعيش وسلاطات وبطاطس وأرز ولتر كوكاكولا، وفيه ساندويتش اسمه شاورمايزر بالموتزاريلا والعيش الإيطالي بـ 35 جنيه وده المفروض أنه أكبر ساندويتش شاروما في العالم على حد قولهم. فتات الشاورما حجمين، وسط (20 جنيه) وكبير (24 جنيه) وفيه أكلات صيامي كثير بالخضروات المشوية والبطاطس. وفيه منيو للوجبات زي الدجاج السوفلاكي والأرز بالخلطات المكسيكية وفيه رابس للستيك والطاووق المغربي لكن الأصناف دي لسة ما اشتغلتش رغم وجودها في المنيو.

بدون مبالغة هنا هـ تأكل أجمل وأطعم فتة شاورما ممكن تتخيلها، بقطع لحم أو دجاج مشوية بحرفنة على الجريل وصوص طماطم رائع هو سر صنعة طرطوس وعيش مقرمش وأرز بسمتي ومعاه سلاطة زبادي ماحصلتش، وجبة رهيبة والكمية معقولة ومشبعة، يعني الحجم الكبير اللي بـ 24 جنيه ده هـ يقوم بالواجب تمام لو كنت جعان قوي، وهـ تستمتع بطعم فريد ميزته أنه مش بـ يتغير من زيارة للتانية، لأن «طرطوس» كمطعم تابع لشركة كبرى متخصصة في المطاعم بـ يطبق مواصفات معينة في الأكل بتاعه وده معناه أن الجودة ثابتة “وده عن تجربة أكثر من مرة” يعني كأنك بـ تأكل في ماكدونالدز أو كنتاكي، أنت عارف كل مرة طعم الأكل هـ يبقى إيه بالضبط وبـ تروحله مخصوص لما بـ يوحشك الطعم ده، وده جديد بالنسبة للأكلات الشامية اللي انتشرت جدًا في القاهرة لكن برضه بـ نلاقي تذبذب في المستوى من مكان لمكان ومن زيارة للثانية، الموضوع هنا مختلف مع «طرطوس».

جربنا كمان ساندويتش عملاق من شاورما الدجاج واللحم بالجبن الشيدر وفلفل الهالبينو بـ 20 جنيه لذيذ وحار جدًا وطعمه مش شبه أي ساندويتش في أي حتة تانية، بـ ننصحكم تسأله عليه وتجربوه. وفيه منيو بسيط للمقبلات زي البطاطس الويدجز والحمص وحلقات البصل اللي غالبًا بـ يجيبوها من مطبخ «بافلو» برجر الموجود داخل المطعم برضه، لكن مافيش مقبلات شامية بالمعنى المفهوم.

تجربتنا كانت عظيمة في «طرطوس» وماكانتش أول مرة وأكيد مش هـ تكون الأخيرة، لما تحب تأكل فتة شاورما بحق وحقيقي، عليك وعلى محلات طرطوس اللي قريب هـ يبقى لها فروع في كل حتة حسب ما إحنا متوقعين.

نصيحة 360

كان فيه فرع في المهندسين تم إغلاقه مؤخرًا لكن هـ يتم افتتاح فرع شارع الهرم قريب، وفيه فروع تانية في السكة.  

أحسن حاجة

مذاق فريد للشاورما مش بـ يتغير من زيارة للثانية، جودة ثابتة وأسعار جيدة.

أسوأ حاجة

مافيش حمام داخل المحل.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح