The Definitive Guide to Living in the Capital , Cairo , Egypt

فاطمة – Fatma

فاطمة: مطعم الحاتى بشكل جديد فى أركان مول الشيخ زايد

  • أركان مول - الشيخ زايد
  • لبناني
  • 01006280037,0238516286
تم التقييم بواسطة
Angie El Batrawy
قيم
قيم الآن
فاطمة: مطعم الحاتى بشكل جديد فى أركان مول الشيخ زايد

مطعم الحاتى اللى اشتهر فى الإسكندرية بكذا فرع ونجح قرر أنه يعمل “نيولوك” وييجي القاهرة بمطعم “فاطمة – Fatma” فى أركان مول بالشيخ زايد، أول ما شفنا الاسم الفضول نط جوانا وكنا عاوزين نعرف مين هى “فاطمة” دي اللى اتسمى المكان باسمها.. ومحطوط صورة كبيرة لها فى مدخل المطعم، ولقينا أن وراها قصة كبيرة.

القصة مكتوبة فى أول المنيو اللى نزلت لنا أول ما وصلنا فى الصفحة الأولى: فاطمة واحدة من صغرها بتحب الأكل اللذيذ وعرفت من جدتها سر الطبخ وعجين الخبيز، ولأن والدها كان سفير لفيت بلاد كثير ومن كل حتة أخذت منها أحلى أكلة.

الترحيب الدافئ اللى استقبلنا على مدخل المطعم شجعنا أننا نخوض التجربة، واللى شجعنا أكثر الأطباق الجديدة اللى لقيناها فى المنيو، وعندهم قسم للإفطار، طلبنا استغرق وقت كبير جدًا عقبال ما وصل، أول حاجة وصلت شوربة الحريرة (28 جنيه) اللى لأول وهلة شكينا أن الطلب جاء لنا غلط، لأن لونها كان أحمر زي شوربة الطماطم، ومش فيها المكونات الطبيعية للحريرة: أرز وحمص وعدس وكزبرة وبقدونس وقطع لحم فيليه، أول مرة نشوف فيها صلصة حمراء كثير كده وفيها قطع لحم لكن معاها بس حاجة زي لسان العصفور، الصراحة إحنا بـ نفضل المكونات الطبيعية لها، ده غير أنها جاءت لنا باردة جدًا، تقريبًا نسيوها فى المطبخ وده سبب التأخير وكونها باردة.

ثاني حاجة رشح لنا الجرسون سلاطة الروكا (28 جنيه) وهى عبارة عن جرجير عليه زيت زيتون وقطع مشروم وفلفل ألوان مقطع شرائح صغيرة مع جبن البارميجان وشرائح الفراخ، السلاطة دى رائعة، عامة إحنا بـ نحب أى سلاطة مكونها الأساسي الجرجير، ميكس المذاقات اللى فى الطبق كان حلو أوى بس النقطة الوحيدة أن طعم البارميجان ما كانش واضح أوى فيها.. ده تعليقنا الوحيد.

من الأطباق الرئيسية اختارنا فتة فاطمة باللحم البتلو (45 جنيه) وكمان فريك بالبشاميل والفراخ (55 جنيه) ودي أول مرة بالنسبة لنا نشوف فريك بالبشاميل فتحمسنا لأننا مش متخيلين طعم الاثنين سوا هـ يكون عامل إزاى، والمفاجأة أن طعمها كان رائع جدًا، جاء لنا سخن ملهلب وطبقة البشاميل المحمرة على الوجه وكمان الحبة اللى كانوا ممزوجين بالفريك جواه كانت وهمية، قطع الفراخ ما كانتش كثيرة أوى فى البرام الفخار وكمان كان فيه قطع كبد فراخ مقطعة صغير أوى، الفتة كانت رائعة، قطع اللحم ما كانتش مليانة دهن ومستوية كويس أوى، ورائحة الثوم والتتبيلة مع الأرز والعيش كانت حلوة جدًا، وبرضه قُدم لنا فى برام فخار وسخن جدًا.

بعد الأكل بشوية طلبت معانا نحلى، فيه حاجات فى الحلو ما كانتش متاحة وقت زيارتنا، لكن الدندورمة (28 جنيه) كانت موجودة، ودى عبارة عن حاجة زي كنافة شعر معاها آيس كريم مستكة، وكمان أخذنا مشروب مون لايت (24 جنيه) وده عبارة عن كوكتيل أناناس ورمان، الدندورمة جاءت لنا لونها أبيض جدًا، لكنافة كانت شكلاً وطعمًا أقرب لغزل البنات، سكر طرى وهش بـ يذوب فى الفم مع الآيس كريم، لكن الآيس كريم ما كانش مستكة خالص وطعمه كان أكثر فانيليا ضعيفة، بس كانت كتحلية لطيفة وخفيفة، بالنسبة لمشروب مون لايت كان منعش وجميل ومزج الأناناس مع الرمان كان أول مرة بالنسبة لنا نجربه، بس جامد جدًا.

وأنت بـ تحاسب فى الآخر عاملين افتكاسة حلوة أوى، الـ Receipt كانوا حاطينه فى كيس الفلوس بتاع الستات القديم اللى بكليبس، كانت حلوة أوى ومبتكرة منهم، المكان لسه فاتح من 10 أيام وبالتالى فيه أخطاء ممكن تحصل فى البداية لازم نعديها لأن ده شأن أى مكان، لكن ده ما يمنعش أننا استمتعنا بوقتنا فى “فاطمة”.

نصيحة 360

مطاعم أركان مول كلها تغلبت على مشكلة انقطاع التيار باستخدام الـ Generators، مافيش حاجة هـ تعكر صفو خروجتك إن شاء الله.

أحسن حاجة

الفريك بالفراخ والبشاميل.

أسوأ حاجة

بعض الأطباق ما كانتش موجودة بسبب انقطاع التيار المتكرر!

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح