The Definitive Guide to Living in the Capital , Cairo , Egypt

فيتوريوس – Vittorio’s

فيتوريوس: اوعى تروح مطعم إيطالي ما تعرفوش في المعادي

  • 14 شارع 231
  • إيطالي
  • 0225210306,01001603375,0225210310
  • 12 ظهراً - 11 مساءً
written by
Nagla Ashraf
قيم
قيم الآن
فيتوريوس: اوعى تروح مطعم إيطالي ما تعرفوش في المعادي

لما حد يقول لك يلا بنا نتغدي في مطعم إيطالي، وأنت في القاهرة العزيزة، لو أنت ما تعرفوش ما تروحش، أول حاجة تيجي في مخك البيتزا والمكرونة والجو الأوربي البسيط، إحنا لاقينا الجو الأوربي البسيط لكن قعدنا ندور على الطعم الإيطالي، أو المصري، أو اليوغوسلافي حتى يا مؤمن، مالقيناش إلا بطن جعانة وحسرة للنظر في الطبق اللي مش عارفين نخلص نصفه حتى.

برغم أننا ما بـ نحبش النقد القاسي، إلا أنه ما باليد حيلة، أول ما دخلنا المطعم الإيطالي “فيتوريوس – Vittorio’s” لاقينا المكان هادي وعدد الناس قليل، الديكور كان بسيط جدًا ومؤدي للغرض، استقبلنا الجرسون أو صاحب المحل مش متأكدين الصراحة، لأنه كان رجل كبير في السن وشكله محترم، وقدم لنا المنيواللي كان كله أكلات إيطالية عادية، والأسعار متوسطة.

طلبنا في الأول سلاطة بالمأكولات البحرية Insaalata Di mare بـ 30 جنيه، كانت طازة وفاتحة للشهية، خلت توقعاتنا ترتفع عن مستوى الأكل اللي هـ يوصل لنا. لحد ما جاءت أول إشارة يا كبير، عصير الليمون بالنعناع غير الليموني (14 جنيه) ويلوموني ما يلوموني بأننا لازم نسيبه بعد كده ونمشي،لكن قُلنا نعطي لهم فرصتهم كاملة، العصير كان بلا طعم أو ماهية، يعني ما تعرفش المشكلة أن السكر قليل بس، ولا مافيش لبن، ولا النعناع كثير، مجرد طعم مر في فمك ولذعان، وبعد ما واجهنا الجرسون بالحقيقة دي صُدم يا حرام وقال لنا:”ده أنا اللي عامله”، وحاول يضبطه على قد ما يقدر، بس ما اختلفش غير أنه حط ليمون مُر زيادة وزود ثلج، علشان ما كانش ساقع. هو صعب علينا الصراحة بس فعلًا مش هـ ينفع نجاملك في عصير الليمون، اللي بـ نعمله في البيت، قلنا يمكن المشكلة اختلاف أذواق مش قضية، أكيد الأكل هـ يبقى حلو.

ويا ريتنا سمعنا كلام الهاتف اللي جوانا اللي كان بـ يقول: “جومي بنا نمشي”، طلبنا صدور فراخ مع لحم البيكون والصوص الأبيض Scalo Saltiboca بـ 75 جنيه، والحق يقال أن شكلها في الطبق ما كانش أحلى من طعمها نهائي، لأول مرة في حياتنانبقى مش عارفين، إذا كان اللي بـ نأكله ده لحمة ولا فراخ، مع القضمة الثانية يمكن الصوص الأبيض يغير من وجهة نظرنا، إلا أننا ما قدرناش نأخذ قضمة ثانية خالص، الصراحة الطعم مع الشكل كان صعب للغاية أننا نتهور ونكمل الطبق، ده حتى الأرز كان معجن، والبيكون كان بـ يستغيث على الطبق كل أطارفه رافعة أيديها لفوق، ولا كأن البوليس مرفعها، ومع كل ده حجم الطبق كان صغير جدًا.

أما الطبق الثاني المفروض أنه قطع لحمة فيليه بالصوص البني والبصل Spezzatino Filet بـ 85 جنيه، مازلنا محتارين في أمره لأننا فضلنا كثير لحد ما اختارناه، طبق محير من البداية للنهاية، واللي كان مخلينا محتارين أكثر أن الأكل الجانبي مع الطبق كان حاجة واحدة بس،إما أرز أو خضار أو بطاطس، وإحنا كنا عاوزين نجرب المكرونة، فالجرسون تكرمًا منه ومش من المنيو عملهالنا خدمة، لأننا أول مرة نروح له المحل، ولما سألته عن الصوص بتاع المكرونة هـ يبقى إيه ارتبك، وقال لي:”صوص اللحمة!”، إحنا الصراحة انبهرنا.. حضرتك طيب إحنا عاوزين صوص ثاني، وفضلنا نتناقش ونتحاور لحد ما وصلنا أنه هـ يبقى صوص أحمر ويحط عليه جبنة بارميزان، ويا ريته ما كان جاملنا وبدلها لنا بمكرونة، لأن الصوص الأحمر ماكانش موجود تقريبًا مع المكرونة هو كان تحت في الطبق والمكرونة بـ تطلع في الشوكة لوحدها وكأنها مخاصماه وده لأن الصوص ما استواش طبعًا، ده غير أنه كان مالوش طعم خالص الحمد لله، أما بالنسبة لقطع الفيليه أيها السيدات والسادة هنا المفاجأة.. حيث أن كان فيه قطع كبدةمع اللحمة الفيليه أو الصوص كان مطرحه كبدة.. الله أعلم،اللحمة كانت مستوية زيادة عن اللزوم مع المشروم، أما لشهادة الحق فالمشروم كان طعمه حلو، يمكن هو حط الطبخة على النار، لحد ما المشروم يستوي فقطع اللحمة استويت زيادة.

ونختم بالبروفترول (20 جنيه) وكان طعمه مقبول، لكن من الواضح أن صوص الشوكولاتة كان جاهز تقريبًا مش مطبوخ، فطعمه ما كانش الأفضل.

ونتعلم من ده يا جماعة أن التجربة لها فوائد عظيمة، فبالرغم من الأكل غير الشهى بالمرة إلا أن معاملة الناس هناك كانت مرحبة ومجتهدة لإرضاء الزبون، يمكن بس محتاجين طباخ ثاني.

نصيحة 360

الجواب بـ يبان من عنوانه.. لما تلاقي من أول حاجة طلبتها طلعت وحشة ما تكملش للآخر و"اجري يا مجدي".

أحسن حاجة

سلاطة المأكولات البحرية.

أسوأ حاجة

التقديم والأكل بصفة عامة.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح