The Definitive Guide to Living in the Capital , Cairo , Egypt

كركاس – Caracas

كركاس: التميز فى أطباق من لبنان بأركان مول الشيخ زايد

تم التقييم بواسطة
Angie El Batrawy
قيم
قيم الآن
كركاس: التميز فى أطباق من لبنان بأركان مول الشيخ زايد

إحنا متأثرين جدًا بزيارتنا دي، بجد
استثنائية.. فى المرات الكثير اللى زرنا فيها “أركان مول” فى الشيخ زايد
وهو دائمًا بـ يجذبنا بألوانه المليئة بالحياة إلى جانب الزحمة المستمرة فى
المنطقة الخارجية للمطعم، ده غير أن اسم «كركاس» كان غريب على ودننا وكنا عاوزين
نعرف ده إيه.

المطعم لبنانى أصيل، واللى أكد لنا ده
لما بحثنا على الإنترنت وعرفنا أن “كركاس” ده اسم منطقة غرب العاصمة
بيروت، وبالسؤال برضه عرفنا أن له فرع ثاني فى المهندسين في شارع
متفرع من ميدان لبنان.

قبل ما نتكلم عن الأطباق لازم نقول أن كل
تفصيلة فى المكان هـ تجبرك أنك تبص عليها وتعجب بها، المكان كله مريح للأعصاب
بألوانه الموف والتركواز والبنى والرمادي، وبـ يكسرها اللون الأخضر لأحواض شجر مدورة
صغيرة فى كل مكان حتى على الترابيزات، واللوجو بتاع كركاس مطبوع على كل حاجة وداخل
فى الديكور والكراسي حتى أنك هـ تلاقيه فى حوض الأيدين فى الحمام! بس شكله حلو
جدًا ومتوظف بشكل رائع، حتى لبس الجرسونات فيه الموتيفة أو اللوجو، فيه مكان
بالداخل لكن الجزء الخارجي كان مغري أكثر بالنسبة لنا.

المنيو طباعتها قيمة وطويلة جدًا ورفيعة
وعاملة زي الأكورديون، فيها صور لناس لبنانيين مختلفة وموجودة برضه على باب
الحمام، هـ تلاقى هناك تشكيلة مزات ساخنة وباردة وسلاطات وأطباق رئيسية وشيشة، أما
ركن التحلية فيا عيني عليه وكمان المشروبات والسموزى (أو الفريسكوس).

الجرسونات قمة فى النشاط رايحين جايين،
الولد اللى كان معانا شاطر جدًا وكان بـ يشرح لنا مكونات الأطباق اللى ما كناش
فاهمينها، طلبنا سلاطة جبنة حلومى وخضروات مشوية (38 جنيه) وفى المقبلات كمان سمبوسك
(لحمة أو جبنة) بـ (20 جنيه)، وفى الأطباق الرئيسية أخذنا لحمة شُقف (اللى هو
الكباب) بـ 88 جنيه، وكفتة (52 جنيه).

نزل لنا زجاجة مياة صغيرة (6 جنيه)،
القعدة كانت ممتعة والجو كان جميل والرؤية مريحة للعين، إحنا كنا مستمتعين لدرجة
أننا أدركنا أن الأكل تأخر شوية بعد فترة، لكن الانتظار نتيجته كانت أكثر من
مرضية، جاءت لنا سلاطة الجبنة الحلوم المشوية وكان تقديمها رائع، الخضار طازج
وألوانه تهبل والجبنة مشويين وعليهم صوص خفيف فيه مزازة خل خفيفة، الطبق كان رائع
بس كان فيه إحساس بـ يضحك قوي أن الجبنة كانت بـ تزيق فى فمنا لأن قوامها كان
متماسك وطري، الخضار كان عبارة عن جزر وفلفل ألوان ومشروم وباذنجان مشوي وكان أكثر
من رائع.

اللحم فى طبق الشُقف كان رهيب، مش طبيعي،
حلو بزيادة، كل حاجة مخدومة صح، الأطباق بـ ينزل لك معاها اختيارين من أرز أو خضار
سوتيه أو بطاطس محمرة، الخضار عامة كان حلو والبطاطس عادية لكن الامتياز الأكبر
للحم، فى الطبق الثاني جاءت لنا 4 أصابع كفتة كبيرة معمولة بالبقدونس فأعطت لها
مذاق مختلف وجميل، وبـ تيجي ملفوفة فى عيش صاج خفيف قوي زي الطبق الأول برضه،
التخديم على الترابيزة له نفس ألوان المكان” الموف والتركواز ودى كانت مبهجة
فى حد ذاتها. السمبوسك كانت مقرمشة واللحم اللى جواها مستوي كويس وملحها مضبوط.

بعد ما شبعنا وأكِلنا حواسنا كلها حسينا
أننا محتاجين نشرب حاجة لأن الأكل كان كله نواشف إلى حد ما، لفت نظرنا عصير لونه
أحمر الجرسونات رايحين جايين به وحسينا أنه مطلوب فى المكان قوي، لما سألنا عرفنا
أنه عصير بطيخ، العصائر ممكن تطلبها فريش عادي أو تبقى سموزي (أو فريسكوس)،  فريسكوس باتل (بطيخ) بـ 20 جنيه، وأخذنا كمان جوافة
باللبن فريسكوس بنفس السعر، بجد “انتعاش”.. الأصناف كلها عندهم تهبل،
ولما مزجناها مع الثلج المجروش كان الانتعاش أكبر، البطيخ طبيعي بزيادة ومش عارفين
نوصفه بالكلام وتفوق على الجوافة، وعندهم حاجة اسمها “عيران” ودي بـ
يكون داخل فيها “الزبادي” مع الفاكهة اللى أنت حاببها أو النعناع.

مسك الختام فى قعدتنا واللى سبب لنا حالة
من الانتعاشة وفى نفس الوقت “حيرة” كانت تحلية اسمها آيس كريم بومب (29
جنيه)، هما إزاي عملوا كده؟ ده “اختراع يا كوتش” على رأى الفنان غسان
مطر، عبارة عن عجينة ذهبية مسكرة كبيرة عاملة زي البمبة زي ما مسميينها وسميكة
شوية وساخنة وبعدين مليانة بولة كبيرة داخلها آيس كريم ساقع مع صوص الكراميل اللى
قدموه منفصل ولوجو المكان برضه مرسوم بالقرفة فى الطبق (معمول استنسل)، إزاي عملوا
مزج بين حاجة سخنة من الخارج وساقعة من الداخل ودى ما ساحتش والثانية ما بردتش؟
احتارنا لدرجة أننا قعدنا نفكر هما ممكن يكونوا عملوها إزاي ودورنا كمان على
الإنترنت، لحد دلوقت مش عارفين، بس بجد كانت مسك الختام.

فيه خدمة وضريبة بـ تضاف على الطلب،
“كركاس” لازم تحجز فيه قبل ما تروح فى جميع الأيام ماعدا الويك إند،
وفيه حد أدنى للطلبات Min
Charge فى الأيام
العادية
100 جنيه والويك إند 125 جنيه.

من الآخر
“كركاس” تجربة هـ نفتكرها كثير لما حد يسألنا على ترشيحات لأفضل أماكن
للخروج والأكل، جودة الأكل مع الخدمة والديكور بالنسبة للأسعار تعتبر
“عادلة”، وكمان لأن “كركاس” بالنسبة لنا “التميز مقدم فى أطباق من لبنان”.

نصيحة 360

ما تغلطش غلطتنا، اطلب مزات وسلاطات زي الطحينة واللبنة مع الأطباق الرئيسية علشان الأكل اللبنانى بـ يكون أغلبه نواشف.

أحسن حاجة

"الآيس كريم بومب".. هو إزاي خطير كده؟

أسوأ حاجة

موضوع الحد الأدنى للطلبات ده مش هـ يخلينا نروحه على فترات متقاربة.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح