The Definitive Guide to Living in the Capital , Cairo , Egypt

لاتينوز – Latino’s

لاتينوز: قعدة ظريفة وأطباق شهية في التجمع الخامس

تم التقييم بواسطة
Waleed Abuarab
قيم
قيم الآن
لاتينوز: قعدة ظريفة وأطباق شهية في التجمع الخامس

دخلنا شارع التسعين في التجمع الخامس وطولنا شوية بالعربية علشان نتفادى الزحمة اللي كانت موجودة أمام داون تاون مول في الوقت ده اللي هو كان ميعاد خروج الموظفين، ولاقينا نفسنا في آخر الشارع عند مبنى الميتنج بوينت أمام جامعة فيوتشر، ومع الروقان وتوافر الركنات قررنا نقضي يومنا هنا ونكتشف مكان جديد نكتب عنه، ووقع اختيارنا على «لاتينوز – Latino’s» الموجود في الدور الأرضي من ساحة الميتنج بوينت المكونة من عدة طوابق بواجهة زجاجية كبيرة وقعدات داخلية وخارجية، وقعدات ثالثة داخل المنطقة الداخلية لغير المدخنين، بس الأخيرة دي كانت كتمة شوية فاختارنا القعدة الداخلية المكيفة اللي مسموح فيها بالشيشة والدخان، واختارنا ركن هادئ على واحدة من الكنبات الكبيرة المريحة جدًا، لكن لفت نظرنا شكل الترابيزات وموديلاتها القديمة وبعض الخرابيش اللي عليها، لكن بشكل عام المكان مريح نفسيًا ومساحته واسعة ودي أهم حاجة، والشاشات موزعة بشكل كويس وهـ تقدر تشوفها من كل الزوايا، والديكورات بسيطة بالألوان النبيتي والأسود والخشبي وبمجرد ما استقرينا حسينا براحة أعصاب وسكينة تعوض الجنون اللي شوفناه في زحمة المرور في طريقنا للمكان.

ما تتوقعش حاجة مختلفة في منيو «لاتينوز» وما تتوقعش حتى أكل أو مشروبات “لاتيني” مثلًا على سبيل التخصص، هو المنيو العادي لأي مطعم وكافيه عالمي، والفيصل الوحيد هـ يبقى جودة المأكولات ومستوى الخدمة، مش نوع المطبخ. هنا فيه بيتزا وباستا وواضح أن عليهم إقبال كثير لأننا شوفنا ناس كثير بـ تطلبهم، وفيه مقبلات إيطالية وسلاطات وأطباق الفيليه والسكالوب والدجاج والفاهيتا والمأكولات البحرية، وفيه إقبال ملحوظ كمان على البرجر والرابس وكوكتيلات الفاكهة الفريش، ومنيو الحلويات فيه آيس كريم وكيك وفروت سلاد وأم علي اللي ما كانتش موجودة وقت زيارتنا للأسف.

الأسطورة بـ تقول جرب كل طبق عليه اسم المحل علشان تجيب الخلاصة، تشيكن لاتينوز (61 جنيه) وفيليه لحم لاتينوز (72 جنيه) وكومبو بلاتر فيه كل المقبلات (45 جنيه)، دي كانت وجبتنا مع الكوكاكولا (11 جنيه) والمولتن كيك بعدها (25 جنيه).

كومبو المقليات فيه حلقات بصل وأصابع موتزاريلا وسبرنج رولز وستريبس دجاج، كله مقلي ومقرمش وفريش جدًا، بـ يُقدم مع صوص الهالبينو ومسطردة العسل والصلصة المكسيكية الحارة، كميته كبيرة وينفع وجبة لوحده. الفيليه كان مستوي كويس وعليه صوص الكابوريا و3 وحدات جمبري كبير وقطع الكابوريا وطلبناه مع الباستا الفيتوتشيني، عرفنا بعد كده أنه من أحسن الأطباق اللي بـ يقدمها المحل، وفعلًا كان مذاقه رائع والجمبري فريش واللحم نفسه شارب الصوص للآخر، بس طبعًا حلاوة الطبق ده بـ تتوقف على مدى استعداد أي حد أنه يأكل ستيك فيليه بمذاق السي فوود، لكن في النهاية الطعم كان لذيذ. طبق الدجاج فيه 3 قطع صدور مغطاة بالجبن البارميزان والتركي المدخن وصوص الكريمة، مع الأرز البسمتي المبهر والبطاطس المحمرة أكيد كان أحسن طبق دجاج ممكن تأكله هنا، والكميات كبيرة فعلًا في الأطباق ورغم أن الأكل كان حادق شوية بس الصنعة حلوة وشوية السلاطة الخضراء اللي بـ ينزلوا على جنب الطبق هـ يبردوا لسعة الملح شوية.

طلبنا فروت سلاد بالآيس كريم (23 جنيه) كان شكلها حلو بس الطعم مش قوي واكتشفنا بعض وحدات الأناناس طعمها كأنه حمضان، طلبنا نرجعها والجرسون ما تأخرش وفي ثانية أخذها وحذفها من الشيك واعتذر لنا بشدة، لفتة كويسة واحترافية من فريق العمل، خلتنا ما نتضايقش قوي من الواقعة كلها، وبسرعة طلبوا مننا نطلب أي حاجة حلوة ثانية، واختارنا المولتن كيك بالشوكولاتة السايحة والآيس كريم، كانت حجمها كبير ودسمة جدًا بس لذيذة ومافيهاش غلطة.

استمتعنا بقعدتنا في «لاتينوز» وحسينا بألفة بسرعة مع المكان وفريق العمل الودود، وأكيد هـ نروح مرة ثانية علشان نشوف إيه حكاية البرجر والبيتزا اللي كل الناس بـ تطلبهم دول.

نصيحة 360

 المكان بـ يفتح من 10 الصبح لحد 2 بعد منتصف الليل حتى في أيام حظر التجول، وفيه منيو مخصوص للإفطار الصبح.

أحسن حاجة

الأكلات اللي بـ تحمل اسم المطعم مميزة بجد.

أسوأ حاجة

الفاكهة المعلبة فكرة مش لطيفة في الفروت سلاد عمومًا.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح