The Definitive Guide to Living in the Capital , Cairo , Egypt

مطاعم
ليليز – Lilly’s

ليليز: مطعم وكافيه لطيف لقعدة فطار فى الشيخ زايد

تم التقييم بواسطة
Angie El Batrawy
قيم
قيم الآن
ليليز: مطعم وكافيه لطيف لقعدة فطار فى الشيخ زايد

موجود جنب "خميرة" و"فطيرة" فى الشيخ زايد، واكتشفنا لما رحناه أن له فرع كمان فى الزمالك، كل ما نعدي من جنبه خاصة بالليل مش بـ نلاقى فيه خرم إبرة وبـ يبقى مليان على آخره شباب وبنات والشيشة هى سيدة الموقف، تحس أن روحه عاملة زي روح "بوترى كافيه" اللى فى الزمالك، نفس لمة الناس والزحمة والأكشن.

ولأننا مش من هواة الزحمة قررنا نروحه فى فترة الصبح نفطر فيه، خاصة لما عرفنا أن عنده منيو مخصوص للفطار والقعدة بتاعته فى الشمس بره حلوة أوى، أول ما وصلنا ما كانش فيه غيرنا وناس ثانيين، الأصناف اللى موجودة فى أول صفحة كانت أغلبها أطباق بيض معمولة بأنواع مختلفة وبعضها نازل معاها فول وطعمية وجبنة، فمثلاًEggs in Basket  بـ (29 جنيه) مكون من 2 توست بالزبدة مفرغين من النص ومعمول فيهم بيض عيون وبـ يقدم معاه 2 سوسيس وبطاطس كروكيت.

من المنيو كمان اختارناLilly Street Breakfast  بـ (29 جنيه) مكون من بيضتين بـ تختار طريقة تسويتهم (أومليت، مخفوق.. إلخ) إحنا اختارناه أومليت ومعاه ميني فلافل وجبنة فيتا بالطماطم وفول وبـ يقدم معاهم عيش شامى، وللتحلية أخذنا بان كيكPancake Stack  بان كيك بـ (3 قطع بـ 29 جنيه) عليها مابل سيرب وزبدة (أو ممكن تختار السيرب نوتيلا وكراميل) وكمان عصير برتقال (23 جنيه) وشاي (11 جنيه) مع إضافة لبن (6 جنيه)، ولو أنت مش عاجبك أى من الأطباق المقدمة أو عاوز تضيف مكون ممكن تطلب كل صنف منفصل على حسب رغبتك زي الفول، السوسيس، التركي، الجبنة البيضاء (15 جنيه للطبق)، أو سلاطة، بطاطس محمرة أو كروكيت، مشروم (7 جنيه)، والتوست (5 جنيه).

أول حاجة نزلت لنا بعد فترة عصير البرتقال، كان فريش، طعمه مزز شوية بس لطيف، فيه عيب خطير فى الترابيزات أنها معمولة من خشب طبيعي، فألواح الخشب مش مستوية وبالتالى كنا خايفين طول الوقت أن العصير يقع علينا، عدت ساعة والفطار لسه ما جاش واستغربنا لأن ما كانش فيه غيرنا وناس ثانيين، وكمان اللى بـ ياخد الطلبات وبـ يقدمها شخص واحد فقط، وبالتالى دي نتيجة طبيعية لبطء الخدمة.

بطننا كانت بـ تصوصو بس أخيرًا قدم لنا التوست بالبيض ومعاه البطاطس الكروكيت والسوسيس، البيض ما كانش مستوى Well-done زي ما طلبنا لأننا مش بـ نحب الزلال اللى فى صفار البيض، فرجع الجرسون به وضبطه كويس، العيش ما حسيناش أن عليه زبدة خالص، كان متحمص بس، اللى كان حلو أوى البطاطس الكروكيت، شكلها ما كانش طويل كالعادة كانت كور كبيرة مقرمشة من بره، ومن جوه البطاطس كانت مبشورة مش مهروسة فأضافت للطعم الطرى المقرمش على خفيف من جوه، وكمان السوسيس كان مستوى كويس ومقطعينه بأشكال حلوة تفتح النفس، لكن فى رأينا البيض كان عادى جدًا ممكن نعمل زيه فى البيت.

ثاني طبق نزل الأومليت مع الفلافل والفول والجبنة بطماطم مع العيش الشامى، الفلافى كان حجمها صغير جدًا (قطعتين فقط) وللأسف كانت مقرمشة أوى من بره وناشفة لدرجة أنك ما تعرفش تقطعها بالشوكة، الفول كان طعمه كويس والأومليت كمان بس برضه عاديين مافيش طعم مميز فيهم أبهرنا، العيش الشامى اللى قدم لنا كمان كان محمص ومقرمش ومش عارفين عملوه كده ليه لأن صعب تاكل ولا الفول ولا الفلافل به، فطلبنا عيش شامى طرى، الجبنة بالطماطم برضه عادية زي اللى بـ نعملها فى البيت.

بعد ما خلصنا وصيناهم من قبلها ما يأخروش البان كيك زي الأكل، وبالفعل نزلت بعدها بشوية، البان كيك كانت لطيفة بس المابل سيرب عليها كان قليل وبرضه ما حسيناش بطعم أى زبدة فيها، مش عارفين إيه مشكلة الزبدة معاهم، سواء على التوست أو البان كيك، العجينة كانت هشة ورفيعة، عامة طعمها لطيف بس مش حلوة أوى زي ما ذقناها فى أماكن ثانية.

"ليليز" مكان لطيف تروح تفطر فيه أكل هـ تحس أنه بيتي، الخدمة بطيئة شوية، بس نعتقد أن الأمر مختلف بالليل مع زحمة الناس، وإلا ما كانش يبقى له زباين كثيرة كده، روحوا جربوا الأطباق الرئيسية عنده شكلها يفتح النفس.

نصيحة 360

شوفوا صفحتهم على الفيسبوك.

أحسن حاجة

البطاطس الكروكيت.

أسوأ حاجة

التأخير والبطء.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح