The Definitive Guide to Living in the Capital , Cairo , Egypt

مولوية لاونج – Mawlawiyah Lounge

مولوية لاونج: أكلات وهمية من الشرق الأوسط فى كابيتال بيزنس بارك الشيخ زايد

تم التقييم بواسطة
Angie El Batrawy
قيم
قيم الآن
مولوية لاونج: أكلات وهمية من الشرق الأوسط فى كابيتال بيزنس بارك الشيخ زايد

فى مقال قبل كده عبرنا عن إعجابنا بكابيتال بيزنس بارك اللى فى الشيخ زايد وكان المقال عن مطعم جوبيل – Jubail، النهارده هـ نكلمكم عن تجربة مختلفة لمطعم على نفس الصف هو مولوية لاونج – Mawlawiyah Lounge اللى عرفنا أنه بدأ فى دبى وده أول Franchise له فى مصر.

لو عاوزين تعرفوا أكثر عن المطعم فى دبي ممكن تزوروا الموقع بتاعه أو صفحتهم على الفيسبوك، بس بصراحة إحنا عيشنا تجربة وهمية جدًا لدرجة مش متخيلين اللى فى دبي عامل إزاى من الحلاوة، اتشوقتم؟ تعالوا معانا نحكي لكم التفاصيل.

كان معانا من أول ما دخلنا جرسون بنوتة كانت مهذبة جدًا وروحها حلوة، كان عندنا فضول نعرف طبيعة المطبخ اللى بـ يقدموه ولما قعدت تشرح لنا أنها أطباق من الشرق الأوسط من لبنان ومصر والمغرب وتونس كان كافى جدًا يحصل لنا إغراء وتنويم مغناطيسى، المنيو كبيرة جدًا ومتنوعة وكنا محتارين ناخد إيه لأن الأصناف كلها مغرية.

استقرينا فى الآخر وطلبنا شوربة طماطم، ومن السلاطات فتوش (30 جنيه)، ومن المقبلات كشك بالفراخ (28 جنيه)، وفى الأطباق الرئيسية عيوننا وقعت على كسكسي بالفراخ (75 جنيه)، وكمان شدنا أننا أول مرة نعرف أن فيه ورقة فراخ (70 جنيه) على غرار ورقة اللحمة، ففضولنا اشتغل وحبينا نعرف هى عبارة عن إيه.

لازم نقول أن توقيت عمل الأكل كان كويس جدًا، أول حاجة نزلت الشوربة وسلة فيها عيش، العيش شامي صغير معول بحرفية وفريش، الشوربة كانت رائعة، كريمي وقوامها مضبوط ونعتقد كان فيها فلفل أحمر كمان أضاف لها مزازة ولون أحمر حلو، كميتها تكفى فردين، وبعدها جات الفتوش اللى عجبتنا جدًا وما كانتش مسكرة بزيادة زي ما بعض الأماكن بـ تعملها بسبب زيادة دبس الرمان، والمكونات كلها فريش والكمية كبيرة، وعامة كميات الأكل هنا كبيرة جدًا حتى المقبلات.

الكشك بالفراخ بقى ده يتكتب فيه أشعار، عبارة عن قطع فراخ متغطية بمعجون الزبادي والكريمة ومتزينة بقطع البصل المقلية وعين الجمل، عاوزين نقول لكم من حلاوتها كان معانا واحد ما بـ يطيقش حاجة اسمها كشك وما بطلش أكل منه، قطع الفراخ كانت مستوية كويس والكشك قوامه مضبوط واللى أضاف للطعم العين جمل مع البصل المقلى.

ندخل على الأطباق الرئيسية، الكسكسي بالفراخ كان شكله روعة، وكان عليه صوص من فوق برتقالى مع الخضار (كوسة وجزر) معمول على الطريقة المغربية، عرفنا بعد كده أن الصوص ده قرع عسلي اللى خلى لون الكسكسي متغير ومدفوس فيه قطع الفراخ من جوه والخضار من فوق، الطبق أو الطاجن اللى اتقدم لنا ده كان مافيهوش غلطة، وكميته كانت كبيرة جدًا لدرجة أخذنا الباقي تيك أواى.

مسك الختام بقى ورقة الفراخ، عبارة عن قطع فراخ مقطعة مع قطع بطاطس وبصل وفلفل مع صلصة حمراء محطوطة فى ورق فويل وبـ تتسوى فى الفرن، طعمها كان حاجة ثالثة خالص، الخضار مهرى والفراخ طرية والصلصة لها طعم مميز، بـ يقدم معاها أرز، وبرضه كانت كميتها أكبر من الكسكسي وأخذنا بقيتها تيك أواى.

ما كانش فينا نفس ناكل حلو، لكن لما تلاقى مكان مستواه رائع كده ما ينفعش تفوت الفرصة، أخذنا كنافة بالجبنة (45 جنيه) تيك أواى برضه وذوقناها فى البيت، حجمها كبير جدًا تكفى شخصين وطعمها حلو وسكرها مضبوط، أطرافها مقرمشة لأن الجبنة مش واصلة للآخر وطرية من النص.. مسك الختام.

اتبسطنا جدًا فى زيارتنا لمطعم مولوية لاونج، وأكيد لو زورنا دبي قريب هيبقى عندنا فضول نجرب الفرع اللى هناك لأن قالوا لنا أن فيه أصناف ثانية كمان مش موجودة هنا علشان مناسبة لأهل البلد أكثر.. "مولوية لاونج" بقى على قائمتنا المفضلة.

نصيحة 360

"مولوية لاونج" بـ يعملوا حفلات وتنورة أيام الويك إند، اعرفوها من صفحتهم على الفيسبوك.

أحسن حاجة

كل الأكل مافيهوش غلطة.

أسوأ حاجة

مافيش.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح