The Definitive Guide to Living in the Capital , Cairo , Egypt

من زمان بـ نشوف «موود سوينج – Mood Swing» الموجود في شارع صغير متفرع من شارع النزهة في أرض الجولف، مكانه مميز وشكله حلو من الخارج وله لوجو مشهور باللون البنفسجي من الصعب أنك تنساه، ولأننا كنا في حاجة فعلًا لتغيير الموود وكسر الملل والاكتئاب المصاحب للأحداث في مصر حسينا أن المكان بـ ينادينا واسمه كان دافع قوي أننا فعلًا ندخل ونفصل نفسنا شوية عن كل حاجة.

المكان فيه مساحة صغيرة للجلوس خارج المحل، لكن روعة «موود سوينج» تكمن في الوجود داخله، وأنك تتفرج على الديكورات والبوسترات اللي على الجدران، المكان بـ يحتفي بالموسيقى بشكل غير عادي، من أول ماكيت الجيتار العملاق اللي مُعلق على الحائط لحد بوسترات نجوم الروك والجاز والموسيقى اللاتينية اللي في كل حتة، وقبل كل ده طبعًا المزيكا اللي بـ تتلعب طوال الوقت والتنوع الكبير والذوق الراقي للأغنيات اللي بـ تشتغل مع اختلاف نوع الموسيقى وزمانها، لكن لأن السماعات هنا نقية جدًا هـ تستمتع بأي أغنية بـ تشتغل وهـ تلاقي نفسك فعلًا بـ تخلق موود جديد، خصوصًا أول ما الجرسون يجيب لك الـ Welcome Drink اللي هو شوت جوافة بجوز الهند صغير كده، وترمي رأسك بعد كده للوراء وتسرح في المزيكا.

منيو عالمي متنوع جدًا، مقبلات وشوربات وأطباق لحوم ودجاج وأسماك وفاهيتا وباستا وساندويتشات وبرجر ورابس وحلويات، وقهوة وميلك شيك وكوكتيلات وسموزي، بس مافيش بيتزا ولا شيشة. بدأنا بكومبو مقبلات موود سوينج سامبلر (61 جنيه) اللي فيه مشروم وحلقات بصل مقلية وبافلو وينجز وبطاطس مسلوقة وكل أنواع الدريسنج اللي تتخيلها ورقائق ذرة تغمسها فيها، طبق رائع وخلصناه في 3 دقائق قبل الأطباق الرئيسية ما تنزل. من منيو الستيك الكبير اختارنا ستيك بصوص الرمان (99 جنيه) مع البنا ألفريدو كطبق جانبي، البنا حلوة جدًا والكريمة فيها كثير، الستيك رغم أنه كان مستوي كويس وكميته معقولة لكن اللحم نفسه مش فريش قوي وكان له نكهة غريبة مالهاش علاقة بالتوابل ولا الصوص اللي عليه، لكن بشكل عام الطبق ده كويس ويعتبر من تخصصات المحل، وزيه كمان طبق رول الدجاج المحشو الجمبري (69 جنيه) اللي رشحه لنا الجرسون وفعلًا كان أكثر من رائع، قطع صدور الدجاج المتبلة بخلطة موود سوينج الخاصة وصوص الكريمة ملفوفة على وحدات الجمبري المسلوق مع الريحان والروزماري، واختارنا معاها أرز أحمر مكسيكي وخضار سوتيه، وبـ ننصحكم تختاروا زينا علشان تجربوا مطبخ موود سوينج على حق، فعلًا كانت وجبة مثالية.

الإغراء كان شديد أننا نجرب الحلويات كمان، الشيفات هنا شاطرين والمكان قعدته حلوة ومزيكته أحلى، جربنا الكوكيز مادنيس (33 جنيه) وهو طبقات من البسكويت وآيس كريم الفانيليا مغطى بالكراميل وصوص الشوكولاتة، وجبة لوحده! ممكن تأكله أنت وأصحابك لو مش هـ تقدر تخلصه لوحدك، والأهم أن طعمه خطير. نفس الكلام بالنسبة للكوكتيلات، أنديجو (31 جنيه) وريبورن (29 جنيه) اللي مذاق الفواكة الاستوائية مسيطر عليها، مانجو وأناناس وفراولة وسيرب بنكهات مختلفة، برضه الكوكتيلات هنا ممكن تبقى اختيار كويس لو مش جعان وحابب تقعد وتغير الموود على طريقة «موود سوينج».

الخدمة جيدة لكن بعض العاملين ينقصهم شوية خبرة، المكان نظيف وأنيق ومناسب لكل أنواع الخروجات، لدرجة أننا لما روحنا كان فيه عريس وعروسة ومجموعة من أصدقائهم قاعدين في المكان “أفراح وقت الحظر بقى” وفي النهاية استمتعنا بتجربتنا في «موود سوينج» وأكيد أصبح على قائمة “المفضل” لنا في مصر الجديدة.