The Definitive Guide to Living in the Capital , Cairo , Egypt

نعناع – Ne3na3

نعناع: مطعم وكافيه ألوانه مبهجة وأكله مصري أصيل في المعادي

تم التقييم بواسطة
Nagla Ashraf
قيم
قيم الآن
نعناع: مطعم وكافيه ألوانه مبهجة وأكله مصري أصيل في المعادي

شارع 9 في المعادي معروف بتنوع المطابخ اللي فيه واختلافها، و ده بـ يعطى فرصة كبيرة لأي مطعم أو كافيه جديد عاوز يثبت نفسه أنه  يكون له مكان هناك. وده اللي عمله نعناع – Ne3na3 اللي فتح مكان Buffalo Burger، واللي جذبتنا ألوانه من أول مرة شوفناه فيها ونقدر نقول أن فعلًا أجمل حاجة في المكان القعدة فيه بألوانه وديكوراته.

أول ما بـ تدخل بـ تشوف اللوجو الأخضر اللي مكتوب عليه نعناع بالعربي، على باب أزرق مع حوائط صفراء، وبعدين بـ تتفاجئ ببهجة الألوان اللي في الورود المتعلقة في قصريات زرع على رفوف ملونة برضه في كل حتة بكل اللوان أصفر وأحمر وأزرق وأخضر مع ألوان الأرفف والحاجات الصغيرة اللي بـ تفرق في المنظر العام، نقدر نقول بلا تردد أن المكان فعلًا تحفة فنية، كمان فيه مكان مكيف جوه، الحمد لله ممنوع فيه التدخين، لأن للأسف المكان الجميل ده فيه شيشة، وده بجانب جو الحر اليومين دول قادر أن يقتل بهجتنا. فاختارنا أننا ندخل جوه في التكييف ونسيب المكان المبهج اللي بره بألوانه لحد ما الجو يهدأ شوية.

أول ما جاء لنا المنيو، اتفاجئنا أن المكان مش كافيه بس، لأنه بـ يقدم أكل مصري كمان، كل اللي قلبك يحبه، ملوخية وفتة ومشويات وحمام، بس أكثر حاجة عجبتنا قسم الفطار، لأن المكان هـ يبقى ممتع قوي يوم الجمعة الصبح مع حبة فطير أو فول وطعمية وبيض. كمان عنده مشروبات كثيرة جدًا.

المهم طلبنا كبداية سموزي ليمون بالنعناع بـ 22 جنيه، وصل على طول بس للأسف كان ناقصه سكر، لكن بعد ما قولنا للجرسون وزود لنا السكر طعمه كان رائع، وبعد حيرة طويلة في منيو الأكل قررنا أننا نطلب سمان مشوي بـ 70 جنيه، واللي بـ يُقدم معاه أرز بالخلطة أو أرز عادي أو بطاطس. طعم السمان كان كويس صحيح هو حجمه كان صغير شوية بس هم بـ يقدموا سمانتين. الأرز بالخلطة كان معقول مش تحفة لأن الزبيب فيه كان كبير وناقص تسوية شوية، بس طعمه كان حلو، وقدموا لنا معاه بطاطس محمرة بس للأسف كانت نية تقريبًا، كنا نتمنى أنهم يقلوها أكثر من كده.

وفي نصف وجبتنا المكان قدم لنا طبق جبنة بالبطيخcompliment  من المكان، والحقيقة أن الحركة دي بسطتنا جدًا لعشقنا للبطيخ، خاصة في الجو ده.

بعد الأكل قلنا نجرب الحلو، اللي كان تقليدي برضه، ما بين فطير بالنوتيلا أو كريم كراميل أو أرز باللبن أو مهلبية، اختارنا كريم كراميل بـ 22 جنيه ومعاه شاي بالنعناع بـ 15 جنيه. أول ما طبق الكريم كراميل نزل لنا، كانت المفاجأة، عارفين لما حاجة حلوة تتعرض لحادثة في الطريق فـ تيجي لك مكشرة، أو متكدرة بالمعنى المصري، الكريم كراميل يا جماعة شكله خوفنا حرفيًا أننا نأكله، لأنه كان مليان فقاقيع من الأطراف، كأنه اتحط في الثلاجة وهو بـ يغلي ففضل الهواء جوه ما خرجش، طعمه كان مقبول مش سيء بس مش حلو، لكن شكله فعلًا خلانا مش عارفين نأكله خالص، والجرسون جاء يسألنا لو كان فيه حاجة، فـ قولنا أن شكله غريب، وبعد ما دخله المطبخ والشيف فاجئنا برده أنه كويس عادي مافيهوش حاجة، قررنا أننا مش هـ نبدله بحاجة، واكتفينا بالشاي اللي كان مضبوط ولو أننا شايفين أن 15 جنيه على شاي فتلة بالنعناع كثير شوية، ولما جاءت لنا الفاتورة لاقينا أنهم شالوا الكريم كراميل من الحساب، ودي كانت حركة محترمة منهم.

بشكل عام إحنا ممكن نعتبر نعناع كافيه أكثر منه مطعم، ينفع لفطار أو مشروب خفيف في المكان اللطيف ده، بس ما وصلش لدرجة احترافية المطاعم، برغم أن الخدمة ودودة جدًا ورائعة والديكور مبهج، إلا أن الأكل محتاج اهتمام أكثر من كده.

نصيحة 360

ممكن تشوفوا المنيو من صفحتهم على الفيسبوك.

أحسن حاجة

الديكورات في المكان وألوان الورود المبهجة.

أسوأ حاجة

الكريم كراميل.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح