The Definitive Guide to Living in the Capital , Cairo , Egypt

مقترح

يماميا: حلقة الوصل بين عشاق الأكل البيتي وطباخينه في القاهرة

يماميا: حلقة الوصل بين عشاق الأكل البيتي وطباخينه في القاهرة

الأكل زي أي حاجة في العالم، بـ تظهر له موضات؛ وطبعًا مافيش أكثر منها في القاهرة، من ضمن الموضات الموجودة في القاهرة –واللي لها علاقة بالأكل- هي الأكل البيتي، كثير من الأماكن والمطاعم بـ تلعب على نغمة الأكل البيتي علشان تجذب أكبر عدد ممكن من الأكيلة من غير ما تقدم المفهوم ده بمعناه الحقيقي، يماميا – Yumamia اختصرت لك الطريق وبـ تقدم لك الأكل البيتي بالمعنى الحرفي للكلمة.

الفكرة ببساطة أن يماميا عبارة عن موقع إلكتروني بـ يجمع اللي عاوزين يأكلوا أكل بيتي مع الأشخاص اللي بـ يحبوا يطبخوا، وعندهم استعداد أنهم يبيعوا الأطباق اللي بـ يطبخوها، الموضوع سهل وبسيط، كل اللي هـ تعمله أنك هـ تعمل أوردر عن طريق الموقع، وتجيب أي حاجة نفسك فيها… دوّر، ادفع وبالهنا والشفا.

بجانب عدد الاختيارات اللي ممكن تلاقيها على الموقع، يماميا كمان بـ يساعد الطباخين الهواة –بمختلف المطابخ المتخصصين فيها- أنهم يوصلوا لأكبر عدد ممكن من محبي الأكلات المختلفة، مش بس كده، ده بـ يقدم لهم عدد كبير من النصائح المتعلقة المطبخ وتصوير الأكل، كل ما عليهم أنهم يفتحوا حساب على الموقع.

أكثر حاجة بـ تميز الموقع أنه سهل الاستخدام، كل طباخ عنده صفحة خاصة به فيها منيو الأكلات اللي بـ يقدمها، نوعها والتفاصيل المتعلقة بها وسعرها وأيام العمل الخاصة به، وده طبعًا هـ يسهّل المسألة كثير لأي حد عاوز يطلب أكل من على الموقع.

حاليًا الموقع بـ يغطي القاهرة والجيزة، وعدد الطباخين فيه بـ يزيد يوم بعد يوم، قريب المأكولات البحرية المعمولة على الطريقة البيتي هـ تغزو إسكندرية كلها لأنهم هـ يغطوها هي كمان، لمعلومات أكثر اضغط هنا.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح