The Definitive Guide to Living in the Capital , Cairo , Egypt

معالم وسياحة

“رمضانك عندنا” حملة مصرية لتنشيط السياحة في رمضان

رمضانك عندنا وزارة السياحة
“رمضانك عندنا” حملة مصرية لتنشيط السياحة في رمضان
بواسطة
Omar Abd-elmaqsoud

مؤخرًا وصلت مصر لمرتبة متقدمة في قائمة الدول اللى بيفضل السياح العرب زيارتها بعد تركيا وقبل دبي، وطبعًا علشان نقدر نحافظ على المرتبة دي، أعلنت وزارة السياحة وهيئة تنشيط السياحة عن إنطلاق حملة ترويجية للسياحة في مصر خلال شهر رمضان الكريم تحت عنوان “رمضانك عندنا”.

وبتهدف الحملة دي لتنشيط حركة السياحة العربية الوافدة لمصر بنسبة 25% خلال شهر رمضان، وده بسبب الأجواء الاحتفالية المميزة في مصر خلال الشهر، وكانت بداية الحملة موفقة لأنها بدأت أثناء مشاركة مصر في ملتقى السياحة في دبي، مع العلم إن عدد السياح العرب اللي زاروا مصر خلال شهر رمضان السنة اللي فاتت حوالي 3 ملايين سايح.

وتعتبر “السعودية” من أهم وأول الدول العربية اللي بتصدر السياحية العربية الوافدة لمصر، وبيوصل متوسط إنفاق السايح العربي أضعاف اللي بيصرفه السايح الأوروبى، خلال متوسط مدة إقامته توصل لأسبوع.

وزيرة السياحة “رانيا المشاط” علقت على موضوع الحملة وقالت إنها بتهدف لتقديم نبذة صغيرة عن الأجواء الرمضانية في مصر احتفالًا بالشهر الكريم، وده في إطار خطة الوزارة للترويج لمصر في سوق السياحة العربية.

وفي خلال كلام وزيرة السياحة، قالت إن الوزارة بتبحث آليات زيادة الحركة السياحية الوافدة من الدول العربية  لمصر من خلال عمل برامج وحزم ترويجية مخصصة للدول العربية، باعتبارها سوق قريبة، و السائح فيها بيمتاز بمعدل إنفاق عالي.

خلال السنة اللي فاتت، تصدرت السعودية التدفقات السياحية العربية الوافدة لمصر، بعدد 900 ألف سايح، جت بعدها السودان بـ 460 ألف سايح وبعدين ليبيا بـ 410 ألف سايح وأخيرًا الأردن بـ 208 ألف.

في نفس الاتجاه، أكد “عاطف عبد اللطيف” – رئيس جمعية مسافرون للسياحة- أن حملة “رمضانك عندنا” هتساهم في زيادة حركة السياحة العربية الوافدة لمصر خلال شهر رمضان الكريم فعلاً، وتوقع “عبد اللطيف” إن عدد السياح العرب هيزيد خلال شهر رمضان الكريم بنسبة 25% لو قارناه بنفس الفترة السنة اللي فاتت.

ومن ضمن إجراءات الحملة زي ما قال “عبد اللطيف”  إن تقريبًا كل الفنادق والمنشآت السياحية سواء مطاعم أو بازارات أعلنت حالة الطوارئ استعدادًا لاستقبال السياح العرب، وده من خلال الارتقاء بالخدمات اللي هتتقدم ليهم، والاهتمام برفع معايير الجودة.

وتعتبر القاهرة المقصد الأول للسياح من بين المدن السياحية المصرية، وبييجي بعدها الغردقة وشرم الشيخ والساحل الشمالى والإسكندرية، وكمان السياحة في مصر تعتبر ثالث مصدر للدخل القومي، بإيرادات بتوصل لـ 9.8 مليار دولار وده حسب احصائيات سنة 2018.

 

مقترح