The Definitive Guide to Living in the Capital , Cairo , Egypt

“على أرض مصر التاريخ يقدر يقول ما شاء”، وواحدة من شهادات التاريخ عن عظمة مصر هي وجود أهم المقابر الأثرية على أرضها، مش بس مقابر فرعونية، لكن مقابر من كل حقب التاريخ المهمة.. والإسكندرية زيها زي معظم محافظات مصر، مليانة بالآثار اللي بتحكي عن عظمة مصر وتاريخها اللي مليان تفاصيل مدهشة، ومن أهمها مقابر “كوم الشقافة” اللي بترجع للعصر الروماني.

ومؤخرًا، نشر موقع CNN الأمريكي تقرير عن مقابر “كوم الشقافة” الموجودة في منطقة بتحمل نفس الاسم في حي “كرموز” غرب الإسكندرية، واللي بيعود تاريخها للفترة ما بين القرنين الأول والثاني الميلادي.

واكتُشفت مقابر “كوم الشقافة” بمحض الصدفة في سبتمبر من عام 1900، وبتضم المقابر الأثرية سلم حلزوني بيؤدي لـ 3 مستويات منحوتة في الصخر، بعمق حوالي 20 متر تحت سطح الأرض.

وبتجسد المقابر دي أفضل الأمثلة على اختلاط الثقافات المصرية والرومانية اليونانية.

وبتحتوي المقابر الأثرية على توابيت مزينة بأكاليل من أوراق العنب، وعناقيد العنب، ورؤوس الميدوسا.

موقع CNN أجرى كمان حوار مع المصور المصري عمر الديابي، اللي وثق بكاميرته مشاهد من مقابر “كوم الشقافة” بهدف توثيق الحقبة الزمنية المهمة دي من التاريخ الروماني في مصر.

وقال “الديابي” إنه شايف أهمية الموقع الأثري ده بتتمثل في أنه نموذج لمقابر “الكتا كومب”، وهو اسم بيطلق على المقابر المحفورة تحت سطح الأرض، وانتشر النوع ده من المقابر في القرون الثلاثة الأولى الميلادية.

وبيحكي المصور المصري إن السلم الحلزوني بياخدك عند مدخل مقابر “كوم الشقافة” بالإسكندرية إلى 20 متر تحت سطح الأرض، وبيتناقص ارتفاع درجات السلم تدريجيًا لدرجة إنه تقريبًا بينعدم لما بنقرب من سطح الأرض.

وبينصح “الديابي” أي شخص حابب يزور مقابر “كزم الشقافة” بمرافقة أحد المتخصصين للحصول على استفادة تاريخية عن النموذج الفريد ده من المقابر الأثرية.