The Definitive Guide to Living in the Capital , Cairo , Egypt

5 مصورين على الإنستجرام هيفكروك بحلاوة مصر

5 مصورين على الإنستجرام هيفكروك بحلاوة مصر

أيًا كان تقييمك لوضع مصر كدولة على خريطة العالم، ما تقدرش تنكر أن أم الدنيا دي عليها حلاوة غريبة مالهاش زي؛ فكر فيها كده لو كانت مصر دي واحدة ست كان شكلها هيبقى عامل زي… جميلة جمال غير معتاد، شخصيتها مركبة وعندها ربع طاير، وغير متوقعة… ومع كل ده ما تعرفش تعيش من غيرها -حاجة كده تمشي على تيمة أغنية قديمة لعمرو دياب اسمها "أحبك أكرهك"، ما علينا، الفكرة كلها أننا بنتاخد في زحمة ودوشة القاهرة اللي بتنسينا أن مصر فيها أماكن يتعاش فيها غير القاهرة، الحمد الله عندنا خمسة مصورين على الإنستجرام بيفكرونا أن مصر فيها جمال، وصورهم بتحمسنا أننا نركب أول أوتوبيس رحلات نشوفه أيًا كانت وجهته إيه.

 

1نور الرفاعي:

كمصور وثائقي، نور مختلف عن أي مصور ثاني؛ لأنه بيشوف الجمال في أغرب الأماكن، صوره الموجودة على الإنستجرام مبهرة ومختلفة، وخصوصًا أنه بيروح الأماكن اللي ما عليهاش رجل كثير، زي مثلًا منطقة جبل علبة النائية واللي مش سهل تتراح وتعتبر حلم أي مغامر.

 

 2- نهى زايد:

مؤسسة ماركة Zafir T-shirts، وواحدة من مؤسسي @ArabicTypography على الإنستجرام، نهي زايد بتقوم برحلات عائلية في كل حتة في مصر؛ من الصحاري للجبال وحتى السواحل وبتصور مجموعة بورتريهات مميزة، ده غير التجمعات الصوفية والتكوينات المعمارية والفنية اللي بتظهر جمال مصر الغريب، كل ده وإحنا متابعين وبنقول يا ريت رحلاتنا العائلية زي رحلاتها.

 

3- مصطفى شرارة:

"سبع صنايع والبخت مش ضايع"… ده الوصف اللي ممكن نطلقه على مصطفى شرارة اللي مافيش حاجة ما بيعرفش يعملها، كـ Video Producer مصطفى كان واحد من الأشخاص اللي وراء حملة#ThisisEgypt  بس من قبل الحملة دي وكل محبي السفر ومتابعي الإنستجرام عارفين أن شغل مصطفى مبهر، وعشقه الواضح للمغامرة واختياره للأماكن المختلفة بيحمس أي حد أنه يحضر شنطته ويسافر لوحده ويعيش مع نفسه.

 

4تيمور عثمان:

عضو آخر من أعضاء حملة#ThisisEgypt  تيمور عثمان من أوائل الناس اللي اشتغلت على حملات مماثلة، زي حملته اللي عملها على الإنستجرام من سنتين بهاشتاج#roamegypt  علشان يبقى مُلهم لناس كثير أنهم ينتشروا في أنحاء المحروسة ويشاركوا بصورهم، صوره اللي دايمًا بتظهر روحه الإيجابية بتضم رحلات في الصحاري وتحت المياه كمان، ده غير كوبايات الشاي اللي بيشربها مع أهالي المنطقة اللي هو فيها.

 

5عويس أبو زيد:

الرحالة اللي تقريبًا عنده توقيت زمني ومكاني غير اللي عندنا خالص؛ المصور الحر عنده قدرة أنه يكون دلوقت في بورسعيد وكمان شوية تلاقيه في القاهرة أو نيجيريا، لو ما كانتش صوره من نوعية السهل الممتنع، كنا قلنا أن عويس عنده قدرات خارقة، أو باب زمني ممكن تحاول الحكومة السطو عليه، ما علينا، عويس ميزته اللعب بالظل والنور وده اللي بيخلي فيه نوع من الغموض ما تلاقيهوش في صور أي حد ثاني.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح