The Definitive Guide to Living in the Capital , Cairo , Egypt

من قديم الأزل، والرقم 13 له مهابة خاصة في عالم الأرقام، والبعض بيعتبره نذير شؤم، ويقال إن الموضوع ده يرجع للعصور الوسطى في روما، لما كانت الساحرات بتجتمع مع بعضهم، كل 12 ساحرة مع بعض، وكانوا يتركوا المقعد رقم 13 للشيطان علشان يحضر فيه. ولحد اليوم بترفض بعض الشركات العقارية أنها تضع رقم 13 في الأسانسير، وبترفض بعض المستشفيات تضع رقم 13 على بعض الغرف. حتى أن د. أحمد خالد توفيق كتب “أسطورة الرقم المشئوم” ضمن سلسلة ما وراء الطبيعة.

لكننا قررنا نعكس الموضوع، ونتعامل مع رقم 13 على أنه رقم جميل، لأنه بيمثل بالنسبة لنا السنة دي الذكرى الثالثة عشر لانطلاق كايرو 360. البوابة اللي جمعتنا بيكم وخلتنا نقدم لكم القاهرة بمنظور جديد ومختلف، من أول المطاعم لحد الخروجات.. وطبعًا السينمات والأفلام.

تعالوا نتعرف مع بعض على مجموعة أفلام ظهر فيها الرقم 13.

 

Apollo 13

واحد من أحلى الأفلام اللي اتكلمت عن عالم الفضاء. ويكفي أنه من بطولة توم هانكس. وبيحكي الفيلم عن محاولة ناسا استعادة المركبة Apollo 13 للأرض من جديد، بعد تعرضها لتلفيات كبيرة بتهدد حياة رواد الفضاء الموجودين عليها. تقييم الفيلم 7.7 من 10 على موقع IMDb.

The 13th Warrior

على الرغم من أن الفيلم ماحققش إيرادات ضخمة في شباك التذاكر، لكنه واحد من الأفلام اللي بنحب نتفرج عليها في التليفزيون باستمرار.

بنشوف قصة أنطونيو بانديراس، اللي بيقع في غرام زوجة الملك، بالتالي بيتم الحكم عليه بالنفي، وبيجد نفسه في صراع ضخم بيتطلب منه شجاعة وقوة، وهو مش بيملك كتير منهم.

الفيلم من بطولة أنطونيو بانديراس، مع مشاركة  من عمر الشريف فنان مصر العالمي.

 

الزوجة 13

مين فينا ينسى قصة رجل الأعمال مراد سالم (رشدي أباظة) اللي بتكتشف حبيبته عايدة (شادية) أنه اتجوز 12 مرة قبلها. علشان تقرر أنها تعطيه درس لا ينساه، وتخلي الجوازة رقم (13) جوازه لا تنسى؟!

الفيلم بيحتل المرتبة رقم 100 في قائمة أفضل 100 فيلم في ذاكرة السينما المصرية، حسب استفتاء النقاد على الأفلام اللي اتعرضت من 1896 الى 1996.

13Going on 30

زمان لما كنا صغيرين، كنا بنتمنى ننضم بسرعة لعالم الكبار، لكن إيه اللي ممكن يحصل لو الأمنية دي تحققت حرفيًا، في ليلة واحدة!

قصة الفيلم بتحكي عن بنت صغيرة بعمر 13 سنة بتتمنى في ليلة عيد ميلادها أنها تكبر في السن، وبتصحى اليوم التالي علشان تكتشف أنها أصبحت في  الـ 30 من عمرها، بكل ما يحمله الأمر من تعقيدات وطلبات في الشغل وحتى في حياتها الشخصية.

 

13Hours

وأخيرًا مع فيلم أكشن مميز مقتبس عن قصة حقيقية عن 6 ظباط أمريكيين بيحاولوا يحموا المعسكر الأمريكي في بني غازي، من هجمات المقاومة، في الهجوم اللي استهدف قتل السفير الأمريكي هناك.