الناس دي هما إحنا… في فيلم طويل… أبطاله كلهم كومبارس! بالجملة البسيطة دي بينتهي إعلان فيلم أخضر يابس للمخرج والمؤلف محمد حماد. وعلى الرغم من أن الجملة مش بتحتل حيز كبير من الفيلم ألا أن تأثيرها علينا كان كبير. هل أحنا فعلًا في فيلم كبير كلنا فيه مش بنقوم بدور البطولة؟!
القصة
الفيلم بيحكي عن إيمان. البنت اللي ماشية في ضل العادات والتقاليد الخاصة بالطبقة المتوسطة في المجتمع المصري، ومع اقتراب زواج أختها المسئولة منها، بتبدأ إيمان في رحلة البحث عن راجل يستقبل العريس زي ما بتقول العادات والأعراف. ومع رحلة إيمان بناخد رحلة في حياتنا الشخصية وحياة كل واحد فينا بتفاصيلها اليومية المعادة، ورتمها البطىء والممل في بعض الأحيان.
فريق العمل
محمد حماد في تجربته السينمائية الطويلة الأولى اللي ألفها وأخرجها بنفسه اعتمد على وجوه شابة بتظهر لأول مرة على الشاشة، ومعظمهم أو كلهم من أصدقاء وأسرة محمد والفيلم من بطولة محمد عيسى و سعد عامر و أحمد العايدي و إكرام حنا و نبيل سامي و أسماء فوزي.
الأداء التمثيلي
لازم نضع في اعتبارنا حالة الوجوه الجديدة اللي أصر عليها المخرج والمؤلف محمد حماد، ونقصد هنا أن الممثلين في الفيلم أول مرة يمثلوا، وده بيجعلنا نصنف تمثيلهم في خانة الجيد جدًا، والجميل في الأمر أن كتير من المشاهد كانت بتخرج عفوية وارتجالية وده شيء يحسب لتجربة الفيلم بشكل عام.
السيناريو والحوار والإخراج
الشكوى الأولى اللي هنسمعها من معظم اللي شاهدوا الفيلم هو شعورهم بالملل، لكن في رأينا أن الملل كان مقصود علشان نواجه رتم حياتنا اليومي والبطىء واللي بنعيشه كل يوم بنفس التفاصيل بدون تجديد.
الحوار في الفيلم كان جديد ومختلف وحسينا إنه نابع في المقام الأول من الشخصيات نفسها وكأن مافيش حوار مكتوب! وده يحسب طبعًا للممثلين والمخرج واللي قدروا يوصلوا لنا تجربتهم بشكل صادق وبدون حواجز.
الديكورات وزوايا التصوير
ديكورات الفيلم كانت صادقة ومستمدة من البيئة اللي بيعيشها أغلب المصريين، ونعتقد أن ظهور السلحفاة في أحداث الفيلم دلالة على بطء الحياة ومللها والرتابة اللي بتسير بيها، وكان فيه استغلال ممتاز لزوايا التصوير وطريقة إخراج المشاهد علشان يخرج في النهاية الفيلم قوي بصريًا وبيخاطب عقلنا على أكثر من مستوى.
الخلاصة
أخضر يابس فيلم عن الأنثى والعادات والتقاليد ومحاولة البحث عن شيء جديد ومختلف في حياتنا اليومية.
علشان تبقى عارف:
الفيلم شارك في مهرجانات دولية مهمة كتير منها مهرجان لوكارنو السينمائي الدولي، وده أول فيلم مصري يشارك في المهرجان ده.
أكتب تقييم
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
