The Definitive Guide to Living in the Capital , Cairo , Egypt

بعد متابعتنا له بداية من دوره المثير للجدل في فيلم عمارة يعقوبيان، ومرورًا بكتير من أدواره في السينما والتليفزيون، وبالإضافة لمشاركته في الحياة الثقافية وتأليف الدواوين الشعرية، وغيرها من الأمور. كل ده بيخلينا نثق يوم بعد يوم في أن خالد الصاوي فنان عبقري، وواحد من أفضل من وقفوا أمام الكاميرا في جيله الفني.

لكن العظمة والعبقرية مش دايمًا بتنقذ الممثل من أنه يقع أو يقدم فيه ضعيف.

قصة أخلاق العبيد

فيلم أخلاق العبيد، وهو أحدث أفلام خالد الصاوي، بيحكي عن رجل الأعمال رضوان الجمال، واللي بيعاني من مرض نفسي بيخليه عرضه للانهيار العصبي بسهولة، الأمر اللي بيخليه يرجع من بره لمصر، لكنه بيصادف مجموعة من المواقف والمشاكل اللي بتفجر الأوضاع بالنسبة له، وبتكشف لنا كتير من الحقائق.

فريق عمل أخلاق العبيد

بيشارك خالد الصاوي في بطولة الفيلم يسرا اللوزي، وسارة سلامة، وكارولين خليل، ولطفي لبيب، ومحمد شرف، ورامي غيط، وهو من تأليف عصام الشماع، وإخراج أيمن مكرم، وتم تصويره ما بين مصر وتايلاند.

رأينا في الفيلم

بالنسبة للأداء التمثيلي، وعلى الرغم من تميز خالد الصاوي، لكن في رأينا كان محتاج أداؤه يكون أفضل من كده، أو علشان نكون واضحين: كان محتاج أداؤه يكون أقل انفعالًا وأكثر واقعية. أما أداء باقي الممثلين معاه، فكان تمثيلهم باهت وغير محدد الملامح. وخاصة يسرا اللوزي وسارة سلامة، واللي حسينا إن أداؤهم كان المفروض يكون أقوي من كده.

ديكورات الفيلم واستغلاله التصوير في تايلاند كانت رائعة جدًا، ودي تقريبًا الحسنة الوحيدة في الفيلم، أما الموسيقى التصويرية فكانت متذبذبة ما بين الجيد والسيء.

بنشوف في الفيلم مشاركات من الفنان محمد شرف، واللي كان تعرض لوعكة صحية مؤخرًا، والحقيقة إن شرف من الفنانين الغير مسلط عليهم الضوء إعلاميًا على الرغم من موهبته الضخمة. وبنتمنى إنه يقوم بالسلامة، كمان بنشوف ظهور للفنان مراد مكرم، وهو مقدم برنامج “الأكيل” على قناة سي بي سي سفرة. ومراد من الناس اللي بنتوقع أنه هيشق طريقه في مجال التمثيل بسرعة ممتازة، لإنه موهوب ومن الواضح ان فيه الجزء (المطرقع) الموجودة في أي فنان!

الخلاصة:

أخلاق العبيد كان ممكن يكون فيلم أفضل لو تم الاهتمام به أكتر من كده. فنيًا وانتاجيًا.

علشان تبقى عارف:

يسرا اللوزي بطلة الفيلم من مواليد 1985 ودرست في الجامعة الأمريكية قبل ما تتجه لمجال التمثيل.