The Definitive Guide to Living in the Capital , Cairo , Egypt

أفلام

أنت مين من شخصيات الأفلام اللي بتعرضها حاليًا سينمات القاهرة؟

أفلام أفلام العيد أنت مين من أبطال الأفلام اكتشف نفسك الأبلة طم طم حرب كرموز قبل أمه ليلة هنا وسرور
أنت مين من شخصيات الأفلام اللي بتعرضها حاليًا سينمات القاهرة؟
بواسطة
Mohamed Hamdy

إيه أكتر حاجة بنحبها في الأفلام؟ الشخصيات اللي بنشوفها على الشاشة، والأنماط المختلفة اللي بنحس طوال الوقت إن جزء كبير من تركيبتها متاخده من شخصياتنا إحنا بالذات.

وبما إن الأفلام العربي المعروضة حاليًا حققت نجاح كبير باعتبارها أفلام موسم العيد أصلًا، فلازم كل واحد فينا هيحس أن واحد من أبطال الأفلام دي بيمثل شخصيته هو. والاختبار ده هيساعد كل واحد فينا يعرف هو مين.

  • بتحب المغامرة ومش بتحسب النتائج المترتبة على المخاطرات بتاعتك طالما بتشعر في النهاية إنك على حق؟
  • بتنتصر للحق وتحب تجيب حق المظلوم مهما بانت لك صعوبة الانتصار للحق ومهما كان الظالم قوي ومسيطر؟
  • قلبك ميت وممكن تعمل أي حاجه طالما مقتنع بيها مهما كانت النتيجة؟
  • بتحب المواجهة ومش بتخاف تقول للظالم أنت ظالم في عينه مهما حصل لك من متاعب نتيجة ده؟

لو فيك الصفات اللي فاتت دي يبقى أنت أكيد (يوسف المصري) أو أمير كرارة اللي قام بدور مأمور القسم في فيلم حرب كرموز، واللي بيرفض تسليم شباب مصريين وطنيين أنقذوا بنت مصرية من الاغتصاب على إيد ضابط إنجليزي من ضمن القوات الإنجليزية اللي احتلت مصر في فترة أربعينيات القرن العشرين.

  • لما بتقع في أي موقف صعب بتعرف تخرج منه بالحيلة واختلاق الأكاذيب؟
  • بتكدب أكتر ما بتتنفس؟
  • من محبي نظرية المؤامرة وأن أجهزة المخابرات واقفة وراء كل حاجة بتحصل حوالينا في المجتمع؟
  • بتعرف تعمل حوارات من مافيش؟ لو روحت الشغل متأخر تقول للمدير بتاعك إنك اتأخرت علشان كنت بتنقذ أسرة بريئة من غزو فضائي؟

لو فيك الصفات اللي فاتت دي تبقى سرور أبو الدهب النصاب المحترف من فيلم ليلة هنا وسرور، واللي أقنع زوجته إنه ضابط مخابرات مصري بيهرب من الموساد والمخابرات الروسية علشان يسرق قطعة أثرية مهمة ويقدر يبيعها! شخصية بتكدب زي ما بتتنفس!

  • شايفة نفسك جريئة ومش فارق معاكي حد وممكن تعملي أي حاجه في أي وقت؟
  • لما بتخرجي مع صاحباتك بتكوني أنتي اللي بتواجهي أي مشكلة أو خطر يقابل الشلة زي مثلًا العامل مع السايس المختل عقليًا؟
  • متناقضة وبتحبي الأطفال لكن في نفس الوقت بتكرهي المشاكل اللي ممكن يوقعوكي فيها أو المصايب اللي بيعملوها في البيت؟
  • أيام المدرسة كنتي شقية وبتعملي مشاكل مع الكل وطول الوقت بيجيبلك استدعاء ولي أمر؟

إنتي أكيد لو فيكي الصفات دي تبقي الأبلة طم طم من الفيلم اللي بيحمل اسمها.. مدرسة بتواجه مجموعة من المجرمين اللي بياخدوا الطلاب اللي فيها رهائن

  • بتحاول تعيش دور البلطجي الجامد اللي مافيش حاجه ينفع تقف قدامه؟
  • على الرغم من إن ملامحك وجسمك بيقولوا إن مالكش قلب لكن قلبك كبير ودمعتك قريبة؟
  • وقت المشاكل أصحابك بيخلوك تتكلم علشان شكلك بيخوف الناس؟
  • بتحب القلش والهزار وتحب تعمل مقالب في الناس طول الوقت؟

لو الصفات دي تنطبق عليك تبقى أكيد مجدي تختوخ أو شيكو.. بطل فيلم قلب أمه اللي بيتناول فانتازيا عملية نقل قلب من أم حنونة لمجرم محترف.. الأمر اللي بيترتب عليه سلسلة لا تتوقف من المواقف الكوميدية والمشاكل المضحكة.

مقترح