The Definitive Guide to Living in the Capital , Cairo , Egypt

بعد شهور طويلة كانت جائحة كورونا معطلة فيها الحياة الفنية في مصر، رجعت الأفلام من تاني علشان تنور سينمات مصر بشكل خاص والقاهرة بشكل عام، والفترة دي فيه حركة إيجابية في شباك تذاكر الأفلام السينمائية، اللي حقق الأسبوع اللي فات بس حوالي 25 مليون جنيه و734 ألف جنيه، وكانت المنافسة شديدة بين 5 من أحدث الأفلام في السينمات.

وبحسب تقارير إعلامية، تصدر فيلم النجم محمد هنيدي الجديد “الإنس والنمس” شباك التذاكر في أول أيام عرضه، وحقق 16 مليون و674 ألف جنيه.

بييشارك في بطولة الفيلم الفنانة منة شلبى، صابرين، عمرو عبدالجليل، بيومي فؤاد، عارفة عبدالرسول، محمود حافظ، دنيا ماهر، شريف دسوقي، وهو عن قصة وإخراج شريف عرفة، وسيناريو وحوار شريف عرفة وكريم حسن بشير.

في المركز الثاني في شباك التذاكر فيلم “العارف” بطولة أحمد عز، أحمد فهمى، مصطفى خاطر، محمود حميدة، كارمن بصيبص، أحمد خالد صالح، حازم إيهاب وعدد من النجوم اللي بيظهروا كضيوف شرف أبرزهم محمد ممدوح، وهو تأليف محمد سيد بشير وإخراج أحمد علاء الديب.

وحقق فيلم “العارف” 5 مليون و327 ألف جنيه، وبكدة بيصل إجمالي إيراداته في 4 أسابيع 47 مليون و826 ألف جنيه.

وجاء في المركز الثالث فيلم “البعض لا يذهب للمأذون مرتين” بإيرادات وصلت الأسبوع اللي فات لـ 2 مليون 140 ألف جنيه، بطولة كريم عبدالعزيز ودينا الشربينى وماجد الكدوانى وبيومى فؤاد وعدد من ضيوف الشرف منهم أحمد فهمى وعمرو عبدالجليل ونسرين أمين، وبكده حقق الفيلم إجمالي 35 مليون و925 ألف جنيه في 5 أسابيع.

وفي المركز الرابع بييجي فيلم “مش أنا”، اللي حقق الأسبوع اللي فات مليون و565 آلف جنيه، وبتدور قصته عن حالة نفسية بتصيب “حسن” اللي بيقوم بدوره تامر حسني واللي بتربطه علاقة قوية جدًا بوالدته المريضة وهى الفنانة سوسن بدر.

وبكده بيحقق الفيلم مبلغ إجمالي 42 مليون جنيه و944 ألف جنيه في 7 أسابيع .

وفي المركز الأخير فيلم “أحمد نوتردام”، واللي حقق الأسبوع اللي فات 27 ألف جنيه، بطولة الفنان رامز جلال، والفنانة غادة عادل، بيومى فؤاد، حمدى الميرغني، وبكدة بيصل إجمالي إيراداته لـ 19 مليون و393 ألف جنيه في 13 أسبوع عرض.