The Definitive Guide to Living in the Capital , Cairo , Egypt

الأسبوع ده نزل في السينمات 7 أفلام جديدة، منهم 3 أفلام عربي. وهم: بنك الحظ – تعويذة تو – عندما يقع الإنسان في مستنقع أفكاره فينتهي به الأمر إلى المهزلة. أيوة حضرتك كل ده اسم فيلم. ومن خلال التريلر والأبطال بتوع كل فيلم لاحظنا كام حاجة كده، وحبينا نشاركها معاكم. تعالوا نشوفهم مع بعض:

بيومي فؤاد ومحمد ثروت علينا حق

ما هي ماتتقالش غير كده الصراحة. لأن فيلمين من التلاتة فيهم بيومي فؤاد. فيلم “بنك الحظ” و”عندما يقع الإنسان..”. وتقريبًا كان مشغول بـ 5 مسلسلات مثلًا لرمضان، فمالحقش يشترك في الثالث. بس الفنان “محمد ثروت” لحق وشارك في الـ 3 أفلام ما شاء الله. خلاص بيومي فؤاد بقى جزء أساسي من أي فيلم أو برنامج أو حوار أو حتى رحلة للفضاء الخارجي. لازم نتقبل ده. وهيشاركه في المشوار ده محمد ثروت.

التكرار يقوي السيناريو والحوار

فضلنا فترة طويلة كل أفلامنا العربي بتقوم على 3 عناصر أساسية: رقاصة – بلطجي – أغنية شعبي. المرة دي بقى، والأسبوع ده تحديدًا الأفلام قايمة على 3 عناصر أساسية برضه، بس بشكل مختلف. وهي كالتالي:

بنك الحظ: 3 رجالة بيروحوا يسرقوا بنك، وبيمروا بمجموعة من المواقف الكوميدية.

تعويذة تو: 3 شباب بيعرفوا واحدة على فيسبوك، وبيمروا بمجموعة من المواقف الكوميدية.

عندما يقع الإنسان: 3 رجالة بيتجمعوا على طيارة رايحة لبنان، وبيمروا بمجموعة من المواقف الكوميدية.

وده ياخدنا لثالث نقطة

الكوميديا سيد الموقف

الـ 3 أفلام اللي نازلين كلهم كوميديا. يعني مش بس كل فيلم بيدور عن 3 شخصيات، لا ده الثلاثة بيدوروا في إطار كوميدي. طب حضرتك هو كله ضحك، ضحك؟ مافيش أكشن أو دراما خالص؟

دول كام نقطة لفتوا انتباهنا فقولنا نفرفش معاكم بهم. بس يا ترى الأفلام دي هتطلع فعلًا حلوة ولا مش بتقدم جديد؟ استنوا مقالتنا النقدية عن كل الأفلام خلال الأسبوع ده.