الأفلام اللي حققت أعلى إيرادات في سينمات القاهرة
أفلام أفلام العيد الأبلة طم طم القاهرة حرب كرموز سنمات القاهرة سينما قلب أمه كارما ليلة هنا وسرور
Cairo 360
أجازة العيد ما تحلاش عند ناس كتيير من غير دخول السينما والخروج والفسح، ولو أنت مش بتحب تروح سينما في العيد وبتفضل تروح في الرواقة يبقى لازم تعرف أفضل الإيرادات يمكن ده يساعدك تختار الفيلم المناسب اللي تدخله.
المركز الأول
أكتر فيلم حقق إيرادات في سينمات القاهرة من بعد رمضان على طول هو فيلم “حرب كرموز”، وكفاية نقول لك إن الفيلم ده حقق ليلة الوقفة وأول وتاني أيام العيد بس حوالي 12 مليون جنيه في السينمات المصرية.
يعتبر حرب كرموز هو العمل التالت للممثل أمير كرارة مع المخرج “بيتر ميمي” بعد مسلسل كلبش الجزء الأول والتاني، الثنائي حقق نجاح جماهيري على مستوى الدراما، الفيلم بيحتوي على مشاهد حركة وأكشن كتير وكمان بيشارك فيه الممثل العالمي سكوت ادكينز الشهير بـ”بويكا”، وبيرجع بينا الفيلم لفترة حكم الملك فاروق والاحتلال الإنجليزي من خلال شخصية الظابط يوسف المصري اللي بيسكن فى حي «كرموز» بالإسكندرية.
حرب كرموز بيشارك في بطولته غادة عبد الرازق ومحمود حميدة وفتحي عبد الوهاب وقصة محمد السبكي، سيناريو وحوار وإخراج بيتر ميمي، الرقابة صنفت الفيلم فوق الـ12 سنة لأنه بيحتوي على مشاهد عنف وأكشن كتير.
المركز الثاني
أما المركز الثانى بحسب شباك تذاكر سينمات القاهرة، فكان من نصيب فيلم “ليلة هنا وسرور”، بعد النجاح الجماهيري اللي حققه محمد إمام في أفلامه “كابتن مصر” و”جحيم في الهند” بيخوض التجربة السينمائية بفيلم كوميدي مرة تانية، من خلال فيلم “ليلة هنا وسرور” وهو تاني تعاون مع الممثلة “ياسمين صبري” اللي كانت مشاركة في فيلم جحيم في الهند، بتدور أحداث الفيلم حول رجل أعمال بيحب بنت اسمها هنا وبيتورط مع عصابة كبيرة بيضطر للهرب منهم في إطار كوميدي خفيف، ورغم إن الفيلم كوميدي إلا أن الرقابة صنفته فوق الـ12 سنة لأنه بيحتوي على عدد من المشاهد الأكشن.
الفيلم تأليف مصطفى صقر ومحمد عز الدين، وإخراج حسين المنباوي، وهو أول إنتاج سينمائي للمنتج تامر مرسي.
المركز الثالث
في المركز الثالث فيلم “قلب أمه”، اللي بيعتبر تاني بطولات الثنائي هشام ماجد وشيكو بعد انفصالهم عن “أحمد فهمي”، اللي قدموا السنة اللي فاتت فيلم “حملة فريزر” وحقق نجاح جيد، فيلم قلب أمه إخراج عمرو صلاح وهو أول فيلم ليه كمخرج بعد العمل كمونتير في أفلام كتير زي أسماء والحاسة السابعة و678، كمان عمرو صلاح هو مخرج عروض برنامج snl بالعربي اللي حقق نجاح كبير الفترة الأخيرة.
بتدور أحداث الفيلم في إطار كوميدي حول زعيم عصابة (مجدي تختوخ) اللي بيحتاج نقل قلب وبالفعل بيتم نقل قلب أم الشاب (يونس) له لإنقاذه ومن هنا بتبدأ المواقف الكوميدية.
بيشارك في بطولة فيلم قلب أمه بيومي فؤاد، محمد ثروت، محمود الليثي، نور قدري.
المركز الرابع
فيلم “الأبله طم طم” في المركز الرابع، ونقدر نعتبر ياسمين عبد العزيز هي الممثلة الوحيدة حاليًا اللي بتقدم بطولات نسائية في السينما بشكل منتظم، آخر أعمالها كان فيلم “أبو شنب” 2016 وماحققش نجاح كبير وقتها عشان كدة الرهان على “أبلة طم طم”، بتدور أحداث الفيلم حول حياة أستاذة موسيقى في مدرسة خاصة اسمها (طم طم)، معروفة بشخصيتها الضعيفة أمام الطلبة وده بيدخلها في مشاكل وبيخلق مواقف كوميدية مع الطلاب وأهاليهم وإدارة المدرسة.
أبلة طم طم بيشارك في بطولته حمدى المرغني وبيومي فؤاد ومصطفى أبو سريع، ومن تأليف أيمن وتار وإخراج علي إدريس.
المركز الخامس
المركز الأخير كان من نصيب فيلم “كارما”.
بعد غياب 7 سنوات عن السينما بعد فيلم “كف القمر” نتيجة اهتمامه بالسياسة والأوضاع الأخيرة في مصر، قرر خالد يوسف يرجع تاني لمحبوبته الأولى وهي السينما من خلال فيلم ” كارما”، الفيلم بطولة “عمرو سعد” اللي حقق نجاح قوي في آخر أفلامه “مولانا” و”غادة عبد الرازق” اللي بتشارك الموسم ده بفيلمين، وخالد الصاوي وماجد المصري وحسن الرداد، وب
بيجسد عمرو سعد شخصيتين بتدور حوليهم الأحداث، الأول شاب مسلم يتعلق بفتاة مسيحية ويتزوج منها بالرغم من اعتراض الجميع، والتاني رجال أعمال متورط في قضية فساد كبيرة.
الرقابة صنفت الفيلم فوق الـ12 سنة لأن فيه بعض المشاهد الجريئة، خالد يوسف صاحب نفس مدرسة أستاذه “يوسف شاهين” في طريقة اختيار الممثلين اللي ليهم تجارب قديمة معاه وبيثق فيهم وبالتالي هتشوفهم تقريبًا في معظم أعماله.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
