على الرغم من زيادة عدد أفلام الكوميديا اللي بنشوفها مؤخرًا إلا أنه من الصعب أننا نقول على فيلم معين إنه ضحكنا بجد. علشان كده فرحنا لما حسينا إن فيلم البدلة مش مجرد رص لمجموعة من الإيفيهات الكوميدية لكن وراه مجهود مبذول واهتمام بالتفاصيل.
البدلة بيحكي عن تامر حسني وأكرم حسني اللي بيحضروا حفلة بأزياء ضباط شرطة، في محاولة منهم للتنكر، لكنهم بيكتشفوا أن (البدلة) ممكن تفتح لهم أفاق كتيرة وتديهم احترام وهيبة ما كانوش يتوقعوها، الأمر اللي بيدخلهم في سلسلة من المواقف الكوميدية اللي مش بتنتهي واللي تم استغلالها ببراعة وإتقان.
على الرغم من أننا شوفنا الأحداث دي قبل كده في فيلم Let’s be cops لكن تم تمصيرها بشكل جيد، واستغلال مكونات القصة علشان تناسب المجتمع المصري والعربي بشكل كبير. ومن هنا بتيجي أهمية أيمن بهجت قمر ككاتب مش بيستسهل التقليد الأعمي وبيحب يحط بصمته المميزة والناجحة في أي عمل بيقوم بكتابته.
المخرج محمد جمال العدل قدم لنا مؤخرًا مجموعة من الاعمال المهمة زي مسلسل أرض النفاق و لأعلى سعر والخروج وحارة اليهود، وعلى الرغم من أن تقديم الاعمال الدرامية هو الغالب على سيرته الذاتية لكنه أثبت إنه قادر على التنوع في نوعية الأعمال اللي بيقدمها وقدر يقدم كادرات رشيقة ومتعوب عليها وخارج التصنيف المعتاد لأفلام العيد اللي بيغلب عليها الاستسهال ومحاولة تصوير أكبر قدر من المشاهد في مكان واحد أو اثنين فقط.
أكرم حسني قادر يقدم لنا دويتوهات سينمائية قوية مع كتير من نجوم مصر، وبعد نجاحه في مسلسل الوصية في رمضان الماضي قدر يثبت لنا إنه موهبة كوميدية مميزة، والدويتو بينه وبين تامر حسني مميز جدًا وإن الاتنين قادرين (يباصوا) لبعض إيفيهات ومواقف كوميدية كتير خليتنا ندمع من كتر الضحك!
دور أمينة خليل كان متوقع، البنت الحلوة اللي بيحبها بطل الفيلم، دور بسيط وما فيهوش عمق.. لكن رغم كده نقدر نقول إن تعبيرات أمينة كانت مميزة، وحسينا إنها بتعمل مجهود علشان تجذب ليها المشاهدين مش بتقدم مجرد دور والسلام.
البدلة فيلم كوميدي مميز وفي رأينا هو أفضل كوميديا اتقدمت في عيد الأضحى 2018.
علشان تبقى عارف: أكرم حسني كان في الأساس ضابط شرطة لكنه فضل الاستقالة والعمل في مجال الفن والتمثيل والكوميديا.
أكتب تقييم
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
