The Definitive Guide to Living in the Capital , Cairo , Egypt

اتعودنا كجمهور عربي، إننا بنشوف أفلام أجنبي من بلدين مافيش غيرهم، أفلام هوليوود أو بوليوود، يعني أمريكا والهند بس، وحفظنا اسامي الممثلين المشهورين وبقينا نستنى كل جديد منهم، زائد أن السينمات في مصر نادرًا أما بتعرض أفلام لبلاد تانية، حتى القنوات الفضائية مش بتجرب تنوع في أفلامها كتير.

الحقيقة بقى، أن الفن السابع أو السينما في كل بلاد العالم تقريبًا، وفيه تجارب عظيمة في الأفلام سواء في القصة أو الإخراج أو التمثيل، غير انك هتشوف ثقافات مختلفة تمامًا عنك وأفكار جديدة عليك، من باب التنويع وفهم الناس دي، بالتالي هتفهم اكتر عن السينما وتعيش جواها بزيادة.

والمرة دي كايرو 360 بترشحلك ليستة أفلام من دول تانية خالص، معظمها كلاسيك لضمان جودتها، يعني روائع السينما هناك، وده أكيد هيخليك تكمل بعدها بقية بلاد الكوكب!

 

1- آميلي Amélie.. فرنسا

مكنش صعب أني أحدد أول فيلم ابدأ بيه، يمكن عشان هو أشهر فيلم فرنسي في العشرين سنة الأخيرة، وأي حد متابع السينما هناك أكيد هيرشحهولك عشان فعلاً هو يستاهل، دراما كوميدية مبهجة جدًا تحس ان كل جمال باريس موجود فيها، الشوارع والمحلات، لبس الممثلين ألوانه زاهية، ورسالة الفيلم كلها إيجابية وتفاؤل هتغير فيك فعلاً، وزي ما اتكتب على بوستر الفيلم (شخص واحد ممكن يغير حياتك…آميلي هتعمل كدة!)

آميلي بولان بطلة الفيلم بنت ذكية ومرحة لكنها انطوائية جدًا، عاشت حياتها كلها بعيد عن الناس، بتلاحظ كل حاجة بنظرة مختلفة عننا خالص، ولما كبرت بتكتشف كنز بالصدفة في شقتها، لكنه كنز ينفع لشخص واحد بس!، بتقرر أنها ترجع الكنز لصاحبه، وبعدها بتساعد كل الناس حواليها بطرق عجيبة مبتكرة تدهشك، لكن في الآخر بتكتشف ان هي نفسها محتاجة للمساعدة.

 هتحس برقي عالي في الفيلم مع رسالة كل مشهد، خصوصًا التفاصيل اللي هتلاقي نفسك بتحبها زي البطلة بالظبط.

 

2- زد Z.. اليونان

فيلم كلاسيكي حاصل على أوسكار أفضل فيلم أجنبي، كله حركة وألغاز وتشويق، والجميل كمان فيه أنه مش مجرد فيلم مسدسات ومطاردات ودم وخلاص، لكنه فيه رسالة دماغ جدًا عن السلطة وكواليس محاربة الأرهاب، حالة بتتكرر في كل بلد وفي كل عصر، يعني الفيلم بيخلط الأكشن بالواقع لدرجة انه المخرج كتب في أول الفيلم ( أي تشابه للفيلم مع أحداث حقيقية هو مقصود ومش صدفة)!

هنلاقي محقق شريف هدفه يعرف حقيقة الحادثة اللي حصلت لشخصية سيادية معروفة، لكن هيكتشف ان فيه تعتيم وتضليل كبير بيحصل، وانه دخل غابة مبترحمش كلها مؤامرات هو مش قدها، مع قدر مش قليل من الفساد، واسم الفيلم Z  معناه باليوناني ( إنه حي) ودي إشارة لازم تشوف الفيلم عشان تفهمها.

 

3- اركضي يا لولا Lola Rennt.. ألمانيا

من أغرب الأفكار اللي ممكن تشوفها في حياتك في فيلم، لأن خلال 20 دقيقة..تلت ساعة بس مطلوب منك فيها تتصرف في مبلغ كبير يساوي 100  ألف مارك ألماني، وده عشان تنقذ حياة صاحبك اللي سرق الفلوس دي من حد واصل ومشبوه جدًا، ده اللي حصل للبطلة (لولا)، فجأة بتضطر تعمل المستحيل تقريبًا!

جمال الفيلم هنا في أسلوب عرضه كمان، لأنه محكي بـ 3 سيناريوهات غير بعض، التفاصيل المختلفة بينهم بسيطة لكن النهاية بتتغير، وبتفضل محاولة لولا ثابتة لإنقاذ صاحبها، رسالة الفيلم عن أهمية الوقت بتفكرنا بفيلم (زي النهاردة) لعمرو سلامة، وفلسفة الثانية الواحدة اللي بتغير حياة كاملة، لكن فيلم لولا إيقاعه أسرع طبعًا والتشويق فيه أعلى.

 

4- أوكچا Okja.. كوريا

المرة دي الفيلم جديد وإنتاج السنة من شركة نيتفليكس اللي بتعرض أفلامها أون لاين مش في السينما، لكن (أوكچا) يستاهل أنه يكون مدخلك للسينما الكورية المميزة جدًا، وكأنك بتشوف نسخة من (كينج كونج) أو (كوكب القرود) بشكل ألطف وأسهل، لأن الفيلم عن علاقة البشر بالحيوان.

المخرج الكوري هنا حاول يعرض أساليب شركات اللحوم الضخمة واستغلالها للحيوانات، وشغلها المشبوه والجشع في التهجين والتعديل الوراثي، مغامرة كوميدية مليانة تشويق عن محاولة طفلة أنها تساعد كائن ضعيف عشان ينجو من جبروت الإنسان، والعلاقة بينهم جديرة فعلاً انك تشوفها.

 

5- مقبرة اليراعات Grave of the fireflies.. اليابان

لو هنرشح فيلم ياباني يبقى الرسوم المتحركة هتكون الأولى والأقرب لكل ذوق، ومعروف عن اليابان انها الدولة الرائدة في الفن ده للكبار، يعني مش موجه للأطفال وبس، انما دايمًا بتقدم فيه قصص جادة ومأساوية كمان، زي فيلم (مقبرة اليراعات) اللي بيحكي عن الحرب العالمية التانية، واللي بلغت قوة تأثيره أن النقاد قارنوه بفيلم حقيقي عظيم هو قايمة شندلر Schindler’s List.

 اليراعات اللي في عنوان الفيلم هي الخنافس المضيئة، حشرات حقيقية جميلة بتنور في الظلام، والبطل بيستخدم الخنافس دي عشان ينور بيها الملجأ لأخته قبل ما تموت ويضطروا يدفنوها، ومع بدء الحرب وهزيمة اليابان، بيعيش الأخين رحلة صعبة للنجاة وسط كل الخوف والدمار وبلاوي الحرب اللي مبترحمش أطفال أو حتى خنافس مضيئة!