The Definitive Guide to Living in the Capital , Cairo , Egypt

في العادة لما بنتكلم عن فيلم جديد لـ “تامر حسني” القصة مش بتكون هي العامل الأهم في الفيلم، لكن طريقة حكي القصة وتقديمها بتكون أحيانًا هي الأهم، وده بسبب طبيعة جمهور تامر اللي بيركز معاه أكتر ما بيركز مع قصة الفيلم.

فيلم “الفلوس” بيدور حوالين نصاب محترف “تامر” بتستعين به بنت جميلة “زينة” علشان يرجع لها فلوسها من نصاب تاني، وهنلاقي نفسنا بنروح مع الفيلم في سلسلة طويلة من التويستات علشان نعيد اكتشاف القصة أكتر من مرة خلال أحداث الفيلم.

الجميل في الفيلم هو إن اللي هيتفرجوا عليه هيكون صعب عليهم يتوقعوا كل القدر ده من التويستات في الأحداث، والأحلى هو طريقة تقديمها وشرحها بشكل يوضحها للمشاهد، وفي نفس الوقت مايخليهوش يحس إنه قدام برامج تعليمية أو “كتالوج” بيشرح له الفيلم.

تامر حسني بيقدم نفس الشخصية اللي قدمها قبل كده في أعمال كتير، وكان نفسنا نشوفه في نمط أداء مختلف، خاصةً إنه دلوقت ومع أعماله السينمائية الكتير بقى محسوب على عالم التمثيل مش مجرد مطرب بيمثل، وده واضح من إصراره على أداء أغنية واحدة فقط في الفيلم، والاهتمام في باقي العمل بالتمثيل فقط.

زينة قدمت أداء مقبول بدون تجديد برضه، لكن شوفنا العكس من “خالد الصاوي” اللي أبدع كالعادة، وقدر يستغل “الجزء اللاسع” في شخصيته الفنية علشان يوظفه بشكل كويس جدًا في الشخصية اللي بيقوم بيها.

على الرغم من إن الفيلم مانقدرش نصنفه كفيلم كوميدي بنسبة 100٪ لكن كان فيه دويتو كوميدي جميل بين “تامر حسني” و”محمد سلام” اللي على الرغم من نمطية دوره لكنه قدر يشيل جزء كبير من عبء الكوميديا في الفيلم.

الفيلم بيشهد كمان ظهور “أحمد السقا” و”مي عز الدين” في أدوار شرفية متوظفه بشكل كويس، وتعتبر لفتة ظريفة من أصدقاء تامر في الوسط الفني.

بنعيب على الفيلم وجود بعض الإيفيهات والمشاهد غير الملائمة أو اللي ممكن ماتناسبش المشاهدين المحافظين، خاصةً إن قطاع كبير من جمهور تامر من الشباب الصغير في السن.