The Definitive Guide to Living in the Capital , Cairo , Egypt

الحقيقة إحنا مش عارفين إيه سر العلاقة الغريبة بين مواسم الأعياد وبين تقديم أفلام أقل ما توصف به أنها هابطة ومالهاش أي قصة أو جدوى من العرض بالأساس! على الرغم من أن عشاق السينما خارجين من رمضان عندهم اشتياق حقيقي لأفلام كويسة.

فيلم بارتي في حارتي من تأليف أحمد عيسي، وإخراج يونس، وبطولة أمينة، دياب، محمد لطفي، دينا، بنشوف قصة مجموعة من الأشخاص في حارة شعبية، واللي بيكتسب أحد سكانها قوة خارقة بتتفجر بعدها مجموعة من المواقف الكوميدية والمفارقات اللي المفروض تخلى الجمهور يضحك.

طبعًا من المفهوم أن القصة في النوعية دي من الأفلام بتكون عبارة عن غطاء لتمرير مجموعة من الرقصات والإيفيهات الجنسية والنكت السخيفة، ومشاهد مصنوعة بجرافيك ضعيف جدًا، وطبعًا لازم كام أغنية مهرجانات على كام رقصة ساخنة، وفي النهاية الكل مبسوط.. المخرج وصناع الفيلم والجمهور اللي عاوز يتفرج على أي حاجة يشغل بيها وقته والسلام.

هل ممكن نقول أي شيء عن الموسيقى التصويرية؟ أو الديكور؟ أو حتى الجرافيك اللي بنعتقد أن أي طفل صغير بيلعب على أي برنامج كمبيوتر ممكن يعمل جرافيك أفضل من اللى شوفناه؟ الحقيقة أن الأفضل مانتكلمش خالص عن أي عنصر من العناصر الفنية مع فيلم زي (بارتي في حارتي) والأفلام اللى زيه، لأن العناصر دي مش موجودة بالمرة في الفيلم، إلا لو اعتبرنا أغاني المهرجانات والأفراح الشعبية موسيقى تصويرية!

الحقيقة أن موسم العيد زي ما هو فرحة لكل محبي الأعياد والخروج والفسح، إلا أنه موسم حزين على كل مهتم بالسينما المصرية، لأنه بيشوفها في أسوأ صورها… هل من منقذ للسينما من كبوتها؟!