The Definitive Guide to Living in the Capital , Cairo , Egypt

حكاية علاء الدين ومصباحه السحري من الحكايات اللي عاشت معانا سنين طويلة، ويمكن كمان بتتوارثها الأجيال لحد النهاردة، برغم إن أول علاقتنا بـ “علاء الدين” والجني الأزرق بتاع المصباح كانت في نهاية سنة 1992 لما قررت شركة “ديزني” تنتج أول فيلم كرتوني بتقنيات حديثة – بمقاييس التسعينات-  وكان مصدر إلهام وإعجاب لكتير من صناع ومحبي أفلام الكرتون، وفضلت أغاني وموسيقى الفيلم معلقة في ودانا وفي ذاكرتنا لحد النهارده.

السنة دي، وتحديدًا كمان يوم 22 من الشهر ده، اطلقت شركة “ديزني” النسخة الأحدث من فيلم “علاء الدين” ببطولة حقيقة واقعية لمجموعة ضخمة من النجوم، لكن الجميل في الموضوع إن بطل الفيلم واللي قام بدور “علاء الدين” كان الفنان الكندي من أصول مصرية “مينا مسعود”.

وبعد نزول الفيلم لشاشات السينما بأيام، اتصدَّر الفيلم إيرادات السينما في أمريكا، مع بداية الأسبوع الحالي، وحقق إيرادات وصلت لـ  86.1 مليون دولار، وكان من بطولة “مينا مسعود” و”نعومي سكوت” و”ويل سميث” ومن إخراج “جاي ريتشي”.

 

 

ولإن “مينا” من أصول مصرية، وبعد نجاحه كممثل عالمي، السفيرة ووزيرة الهجرة الدكتورة “نبيلة مكرم” بادرت بالاتصال بوالد “مينا” علشان تهنيه على نجاح فيلم إبنه، واللي يعتبر نجاح لأبناء مصر في الخارج كلهم.

وقالت “مكرم” إنها تواصلت هاتفيًا مع “صفوت مسعود” والد الفنان “مينا مسعود” وده كان بهدف تعبيرها عن فخرها وسعادتها باللي وصل ليه مينا في مشواره الفني، ده غير تمسكه باللغة العربية والمصرية، لغة وطنه الأم.

مينا مسعود اتولد في مصر في 17 سبتمبر سنة 1991، وهاجر مع أبوه وأمه لـ “كندا”، واتعلّم وقعد هناك لحد ما خد الجنسية الكندية.

وكان لـ “مينا” دور البطولة في النسخة الأخيرة والواقعية من “علاء الدين” لكن الدور ده ماكانش الأول لـ “مينا”، لإنه لعب دور “طارق القصار” في مسلسل “جاك رايان”، وكمان كان له دور في الموسم الأول من مسلسل “نيكيتا”.

والد “مينا” أكد في مكالمته للوزيرة إنهم “مصريين حتى النخاع” وإنهم حرصوا على تربية ابنهم على حُب مصر، ومعرفة أصوله والتمسّك بجذوره، وكمان أكد على إن “مينا” ظهرت موهبته خلال مشاركته في أنشطة المدرسة، وكان سبب في إن المدرسة استدعت أبوه في مرة علشان يقولوله حجم الموهبة اللي بيتمتّع بيها إبنه “مينا” .

أما أغنية الفيلم ”  A Whole New World” فكان ليها نصيب كبير كمان من نجاح الفيلم، وده بعد ما حققت أكتر من 20 مليون مشاهدة في خلال يومين بس من اصدار الكليب اللي ظهر فيه النجم العالمي “زين مالك” مع الفنانة “زافيا” وهما بيغنوا الأغنية الشهيرة.

ممكن تعرفوا فيلم “علاء الدين” بيتعرض في أي سينما من سينمات القاهرة، ومواعيد الحفلات من هنا.