نجوم مسرح مصر ممكن نختلف معاهم في حاجات كتير على الصعيد الفني، لكن ماينفعش ننكر أنهم أسسوا لنفسهم موجة من الكوميديا وعدد كبير من الجمهور اللي بيدخل أفلامهم. ودي تجربة مهما اختلفنا معاها لازم نحترمها ونرصدها.
القصة
الفيلم بيحكي عن شابين بيحاولوا يحضروا حفلة لهيفاء وهبي علشان يتصوروا معاها، لكن علشان يحققوا هدفهم بيقعوا في سلسلة لا تنتهي من المواقف الكوميدية اللي مالهاش أول من آخر.
فريق العمل
الفيلم من بطولة على ربيع ومحمد عبد الرحمن وتارا عماد ومي سليم وبيومي فؤاد وسيد رجب. ومن إخراج سامح عبد العزيز وتأليف جورج عزمي عن فكرة على ربيع.
الأداء التمثيلي
الأداء التمثيلي لكل فريق عمل الفيلم كان نمطي، وكأنهم بيقولوا للمشاهدين :إحنا عارفين أنتم متوقعين مننا إيه وهنديكم ده بدون زيادة أو نقصان، وده أدى لخروج جرعة الكوميديا في الفيلم تقليدية وبدون زيادة أو نقصان أو محاولات للفذلكة وحشر قضايا مهمة أو رسالة للفيلم!
السيناريو والحوار والإخراج
سيناريو الفيلم كان كله إيفيهات كوميدية من أول مشهد لأخر مشهد تقريبًا، وده على الرغم من أنه جيد بالنسبة لفيلم كوميدي، لكنه ألقى كل العبء الكوميدي على الحوار، وده كان في غير مصلحة الحوار اللي وجد نفسه عليه عبء نجاح الفيلم بالكامل تقريبًا. أما إخراج الفيلم فكان عارف نوعية جمهور العيد من الشباب والمراهقين ومن محبي نجوم مسرح مصر وكان عارف يقدم لهم الوجبة الكوميدية المعتادة باقتدار.
الديكورات والموسيقى والأزياء
ديكورات الفيلم كانت قوية ومؤثرة، وكمان الأزياء، لكن موسيقى الفيلم ضعيفة وغير مؤثرة إطلاقًا على الرغم من محاولة الموسيقى إنها تقدم بعض اللحظات المؤثرة، لكن واضح أنها كانت في أخر اهتمامات صناع الفيلم.
الخلاصة
خير وبركة فيلم مثالي للشباب المراهق والأطفال ومحبي نجوم مسرح مصر.
علشان تبقى عارف:
الفيلم يعتبر ثاني فيلم من بطولة علي ربيع بعد فيلم (حسن وبقلظ) عام 2016.
أكتب تقييم
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
