دراما وكوميديا وأكشن.. دليلك الكامل لأفلام العيد 2017
Mohamed Hamdy
شهر كامل قضاه المشاهدين بعيد عن شاشات السينما. شهر كامل قضيناه في حضن مجموعة من المسلسلات اللي بتتراوح بين القوة والضعف. شهر كامل قضيناه في عزومات وتراويح وسهرات رمضانية. دلوقتي جه الوقت أن السينما ترجع من جديد للصدارة.
ومن خلال موضوعنا، هنستعرض مع بعض الأفلام العربية اللي هاتنزل في موسم عيد الفطر 2017.
الأصليين
مفاجأة العيد باقتدار، وواحد من أهم وأفضل الأفلام اللي هاتنافس بقوة في الفترة القادمة. وإن كان في رأينا، أنه كان من الأفضل الفيلم ينزل بعد موسم العيد، والضجة اللي بتحصل فيه.
الفيلم من تأليف أحمد مراد، في أول أعماله المكتوبة خصيصا للسينما. مراد قدم قبل كده أعمال مهمة زي: فرتيجو، اللي تحولت من رواية لمسلسل – الفيل الأزرق، اللي تحولت من رواية لفيلم. لكن الأصليين هو أول سيناريو يكتبه مراد للسينما مخصوص.
إخراج الأصليين لمروان حامد، وهو أيضا نفس مخرج فيلم الفيل الأزرق. ولما نعرف أن البطولة من نصيب خالد الصاوي، اللي قام برضه ببطولة الفيل الأزرق، هنعرف أننا أمام ثلاثي بيعيد قصة نجاحه من جديد. وده سبب مهم لانتظارنا الأصليين في السينمات.
الأصليين بيحكي عن رجل أسمه سمير عليوه بيقوم بدوره ماجد الكدواني، بتتغير حياته رأسًا على عقب لما بيقابل رجل مجهول هو خالد الصاوي.
بيشارك الصاوي في البطولة: ماجد الكدواني ومنه شلبي وكنده علوش ومحمد ممدوح.
جواب اعتقال
ومن جو الغموض والفلسفة، لأجواء الأكشن والحركة. والمرة دي مع محمد رمضان، واحد من أشهر وأهم أبناء جيله من الفنانين. واللي قرر يخوض السباق السينمائي في العيد مع المخرج محمد سامي، واللي ألف أيضًا أحداث الفيلم. واللي بتدور عن شاب بيحاول ينتقم من جماعة إرهابية، تابعة لجماعات الإسلام السياسي. الشاب بيجد نفسه فجأة في صراع ومطاردة بين الشرطة وبين رجال الجماعة. فهل هيقدر يفلت من الفخ المزدوج؟
بيشارك محمد رمضان في بطولة الفيلم دينا الشربيني وإياد نصار وسيد رجب ومحمد عادل ووليد فواز
هروب اضطراري
مين ممكن يواجه محمد رمضان في ميدان أفلام الأكشن غير أحمد السقا؟ ملك المشاهد الصعبة والشقلبات والمشاهد الخطرة.
السقا بيشارك في سباق العيد بفيلم من إخراج أحمد خالد موسى، وتأليف محمد سيد بشير.
هروب اضطراري بيحكي عن شابين بيتورطوا في جريمة قتل ابن رجل أعمال مشهور. وعلشان يثبتوا برائتهم، لازم يهربوا ويمارسوا حياة الخارجين عن القانون. فهل هايقدروا يثبتوا الحقيقة أم هيتعرضوا لعقوبة الإعدام؟
بيشارك السقا في بطولة فيلمه الجديد: غادة عادل وأمير كرارة ومصطفى خاطر وفتحي عبدالوهاب ومحمد عادل.
عنتر ابن ابن ابن ابن شداد
ومن الأكشن للكوميديا، ومع إسم فيلم طويل شويه (عنتر ابن ابن ابن ابن شداد). واللي يبدو أن صاحبه محمد هنيدي أصبح بيتفائل بأسماء الأفلام الطويلة، بعد نجاح فيلمه (رمضان مبروك أبو العلمين حموده). هنيدي بيوعدنا بجرعة كوميدية عالية، بيشاركه في تقديمها: درة وباسم سمرة وإيمان السيد وعلاء مرسي ولطفي لبيب.
الفيلم من تأليف أيمن بهجت قمر، ومن إخراج شريف إسماعيل. وبيحكي عن شاب بينحدر من سلالة عنتر بن شداد المقاتل الشهير. لكن الاختلاف الكبير بين عنتر وصورته الأسطورية في أذهاننا، وبين شكل محمد هنيدي، بيخلقوا عدد ضخم من المواقف الكوميدية.
تصبح على خير
أخيرًا ومع آخر أفلام عيد الفطر، فيلم “تصبح على خير” من بطولة المطرب تامر حسني وإخراج، وتأليف محمد سامي. وهو ثاني عمل له يخرجه ويؤلفه بعد “جواب اعتقال” اللي بنشوفه في سباق العيد السنة دي.
الفيلم كوميدي رومانسي فانتازي. بيحكي عن شاب بيعاني من مشكلات في حياته وبيلجأ لحلها من خلال الدخول في عالم الأحلام.
بيشارك تامر في البطولة: درة ونور ومي عمر ومحمود البزاوي وأحمد زاهر.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
