The Definitive Guide to Living in the Capital , Cairo , Egypt

زي ما رامز بيقدم برنامج في رمضان كل سنة، بقى يقدم فيلم كل عيد. بس للأسف أفلامه بتكون هي هي من غير تجديد. فمش عارفين نلوم رامز على سوء اختياره، ولا على استسهاله.

سبع البرمبة بيحكي عن زوجة بتصاب بمرض نفسي، بيجبر جوزها على انتحال شخصية ممثلين من الأفلام والمسلسلات. زي أحمد السقا وياسر جلال وغيرهم. والمفروض بنشوف مشاهد كوميدية بتتفجر نتيجة انتحال رامز للشخصيات دي.

الفيلم يعتبر كوكتيل من مجموعة مسلسلات وأفلام عربية قديمة وجديدة. لأنه يشبه فيلم (أونكل زيزو حبيبي) في فكرة إظهار البطل بصورة مختلفة، من خلال تقمص شخصيات تانية. ويشبه مسلسل (ريح المدام) بفكرة الاسكتشات أو الشخصيات اللي بينتهي بيها كل فصل من فصول الفيلم. والفكرة بشكل عام مناسبة للمسلسلات أكتر من الأفلام.

لا جديد من رامز جلال. أداؤه السينمائي زي ما هو. وبنحس أنه بيقدم شخصية رامز جلال مش الشخصية اللي المفروض يلعبها في الفيلم. “جميلة عوض” في دور الزوجة بتقدم أداء (جامد)، بدون أن تعبيرات بوشها. ومش عارفين ليه بتعمل كده رغم موهبتها الكبيرة.

الضحك في الفيلم كان مع شخصيات زي محمد عبد الرحمن، بيومي فؤاد، محمد ثروت. وبشكل عام مستوى الكوميديا كان منخفض وماضحكناش كتير. يمكن الأطفال بس هم اللي هيضحكوا على بعض مشاهد الفيلم.

سبع البرمبة محاولة مكررة من رامز جلال، إنه يقدم كوميديا بنفس العناصر اللي استخدمها قبل كده. لكن مفيش أي تجديد أو مغامرة أو موهبة جديدة بيقدمها الفيلم.