The Definitive Guide to Living in the Capital , Cairo , Egypt

قبل ما نقيم أي فيلم، لازم نشوف نوع الجمهور اللي بيستهدفه. وبالنسبة لنوعية الجمهور اللي بيستهدفها فيلم سمكة وصنارة وهم الجمهور المراهق الباحث عن الكوميديا والمغامرة. الفيلم بيقدم للمشاهدين دول اللي هم عاوزينه.

القصة

سمكة وصنارة بيحكي عن مغامرة شابين بيعملوا في النصب على الناس علشان يحققوا مكاسب بسيطة، لكن في يوم من الأيام بتيجي أمامهم فرصة تحقيق عملية كبيرة مقابل ربح ضخم. الأمر اللي أدى في النهاية لمجموعة من المغامرات المختلطة بالمواقف الكوميدية.

فريق العمل

الفيلم من إخراج طارق عبد المعطي ومن بطولة كريم قاسم وأمير صلاح ورحمة حسن وميس حمدان. أما مؤلف الفيلم فهو محمد كرار.

الأداء التمثيلي

الأداء التمثيلي لكل الأبطال كان محتاج يكون أفضل، والفيلم بشكل عام كان محتاج يستوي على نار أهدى، ويتم تقديمه بشكل أفضل. لكن لو هنتكلم عن كوكتيل بسيط من الكوميديا والمغامرة والأكشن. الفيلم ممكن يعجب شريحة المراهقين والشباب من المشاهدين.

السيناريو والحوار والإخراج

سيناريو الفيلم كان جيد وقدر يسحبنا للأحداث من المشهد الأول، أما الحوار فكان محتاج يكون أبسط وأقصر في بعض المشاهد، وبشكل عام نجح الإخراج في التوفيق بين الأداء التمثيلي وسيناريو الفيلم علشان يقدم لنا في النهاية فيلم مقبول مشاهدته، وإن لم يكن أفضل فيلم شوفناه.

الديكورات والموسيقى والأزياء

ديكورات الفيلم كانت جيدة، والإضاءة المستخدمة في التصوير ساعدت على خروج الفيلم بشكل جيد، لكن الموسيقى والأزياء كانت أضعف بكتير من باقي عناصر الفيلم، وكانت محتاجة تكون أفضل علشان يحس المشاهدين أكتر بالأحداث.

لكن بشكل عام مش متوقعين من فيلم زي سمكة وصنارة الأهتمام بالأمور دي بما إنه بيستهدف جمهور مختلف شوية وأصغر سنًا وأقل تركيزًا.

الخلاصة

سمكة وصنارة مش أفضل فيلم كوميدي شوفناه، لكنه فيلم جيد على مستوى الجمهور اللي بيحاول يوصل له ويرسم البسمة على وجهه.

علشان تبقى عارف:

طارق عبد المعطي مخرج الفيلم، أخرج قبل كده فيلم حصل خير وعجميستا.