علشان نعيش جو الهالووين: أقوى أفلام رعب في سينمات القاهرة
Mohammed Sabry
النهارده الهالووين، أو على رأي حزلقوم عيد الهلع. وطبعًا فيه اللي رايح حفلة هنا أو عند سهرة هناك. بس لو أنت مش مظبط أي حاجة ولسه ماتعرفش هتعمل إيه، إحنا هنقول لك على كام فيلم رعب في السينما. ممكن تتفرج عليهم وتعيش برضه أجواء الهالووين.
Jigsaw
الفيلم هو الجزء الثامن من سلسلة أفلام Saw الشهيرة. وفيه بتظهر جثث كتيرة في كل أنحاء المدينة. وتحقيقات الشرطة بتوصل لمشتبه واحد وهو “جون كريمر”، المعروف باسم Jigsaw. لكن المشكلة إن كريمر مات من 10 سنين.
The Neighbor
رجل بيكتشف حقيقة مختلفة لجاره. ولما يراقبه بيعرف عنه أسرار مخيفة، مخبيها في قبو تحت بيته.
IT
ده تقريبًا أقوى فيلم رعب في 2017 لحد دلوقتي. بيدور عن كائن غريب على شكل مهرج اسمه “بيني وايز” بيخطف الأطفال في المدينة، ويتغذى عليهم. لحد ما يقرر 7 أطفال إنهم يواجهوه بكل قوتهم.
The Vault
مجموعة من اللصوص بيسرقوا بنك، وبيعرفوا إن الفلوس موجودة في خزنة قديمة تحت الأرض. لكن لما بيفتحوها بيلاقوا إنهم في خطر كبير. لأن في أرواح شريرة ساكنة الخزنة بتهاجمهم.
Mother
زوجين بيروحوا يعيشوا في بيت منعزل في حياة هادية. لحد ما ضيوف غير مدعوين يقتحموا حياتهم. وتبدأ معاهم سلسلة من الأحداث المرعبة.
The Crucifixion
لما “نيكول” بتقابل الأب “أنطون”، بتلاحظ أحداث غريبة بتحصل. ولما بتتطور الأحداث بيبان إن الأب أنطون خسر معركته في مواجهة الشيطان.
Annabelle: Creation
صانع دمى بنته بتموت، وبعد 12 سنة هو ومراته بيستقبلوا مجموعة من الأطفال من دار أيتام. ومع الوقت بيكونوا ضحية للدمية الشرير “أنابيل”.
هابي عيد هلع.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
