مع مشاهدتنا لأحداث فيلم “على وضعك”، افتكرنا جملة قالها الفنان أحمد مكي في أحد أغانيه (ماحدش عاجبه حاله حالة غيره اللي بتحلا له). الجملة العابرة دي بتلخص حال 99% من الناس، مش بس في المنطقة العربية، لكن على مستوى العالم كله. وهى دي الحبكة الأساسية اللي بتدور حولها قصة فيلم على وضعك.
فريق العمل
الفيلم من بطولة مصطفى أبو سريع. ومصطفى نجم جديد بدأ اسمه يظهر بقوة في عدد من الأفلام والمسلسلات مؤخرًا، من بينها مسلسل الأب الروحي. ولو فاكرين كويس، مصطفى كان صاحب واحد من أكتر الإيفيهات المضحكة في الإعلانات. لما أدى شخصية لاعب الشيش في أحد إعلانات الأغذية الجاهزة، وكان بيغني بطريقة كوميدية أغنية (الليلة ليلة هنا وسرور).
بيشارك مصطفى البطولة المطرب أحمد سعد. وأحمد من الفنانين اللي واجهوا صعوبات كبيرة في الفترة الأخيرة، لكن من الواضح إنه قرر العودة بقوة. أما تأليف الفيلم فكان من نصيب سيد السبكي، والإخراج لسارة وفيق.
القصة
الفيلم بيحكي عن شخصيتين مختلفتين تمامًا عن بعض. أيمن بيعيش حياة كلها مغامرات نسائية، وبيساعده على كده عمله كمدير مكتب كاستنج. وبيلعب دوره أحمد سعد. أما مصطفى أبو سريع اللي بيشتغل في واحدة من شركات المحمول، بيعيش حياة مملة ورتيبة جدًا. لكن بتحصل تجربة علمية من لطفي لبيب، بتؤدي لانتحال كل واحد شخصية الآخر، وتجربة الحياة من منظوره.
الإخراج والسيناريو والحوار
على الرغم من سهولة القصة وبساطتها، لكن الإخراج كان ضعيف وغير مترابط. كمان سيناريو الفيلم كان بيحاول يضع أكبر كمية من الرقصات والأغاني والاستعراضات، على حساب ترابط القصة نفسها. الحوار كمان كان فيه كمية إيفيهات ضخمة، والمواقف الكوميدية كانت على النقيض قليلة وتوزيعها غير جيد.
الموسيقى والديكور
مانقدرش ننكر تميز الفيلم على مستوى الموسيقى والأغاني، وكمان الديكورات كانت بتعبر عن الشخصيات وطريقة حياتها بشكل جيد. خاصة ديكورات المشاهد الداخلية واستعمال الإضاءة فيها.
الخلاصة
“على وضعك” فيلم قوي على مستوى الفكرة، لكنه ضعيف إخراجيًا. واعتمد على كوميديا الإيفيه أكتر من كوميديا الموقف.
علشان تبقى عارف: الفيلم بيحتوي على أكتر من أغنية من أداء الفنان أحمد سعد، المطرب الشهير وبطل الفيلم في نفس الوقت.
أكتب تقييم
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
