The Definitive Guide to Living in the Capital , Cairo , Egypt

مع طرح فيلمين عربيين (عمر الأزرق) و(سمكة وصنارة) في السينمات المصرية، كان لازم نسأل نفسنا، هل بدأ سباق عيد الأضحى السينمائي بشكل مبكر؟ الإجابة هنعرفها من خلال موضوعنا عن عمر الأزرق.

القصة

الفيلم بيحكي عن قصة صعود أحد تجار المخدرات في مصر من البداية وحتى قدرته على الاستحواذ على حصة كبيرة من السوق في مصر. الأمر اللي بيخلق له عدد كبير من الكارهين اللي بيحاولوا يقضوا عليه. لكن هل هينجحوا في اللي بيسعوا إليه؟

فريق العمل

الفيلم من بطولة نضال الشافعي وصبري عبد المنعم وزكي فطين عبد الوهاب ونهال عنبر وهبة والمخرج إيهاب عبد اللطيف، أما التأليف فكان من نصيب عمرو فهمي.

الأداء التمثيلي

نضال الشافعي يعتبر البطل الحقيقي للفيلم، والحقيقة إنه قدر يقوم ببطولة الفيلم بشكل جيد، لكن بنعيب عليه بعض المبالغة في بعض المشاهد اللي قام بأدائها، أما أداؤه لمشاهد الأكشن فكان قوي ومميز ويستحق الإشادة. أما باقي أبطال الفيلم فكان أداؤهم التمثيلي جيد لكن في نفس الوقت كانوا محتاجين مساحة دورهم تكون أكبر وأوسع.

السيناريو والحوار والأخراج

سيناريو الفيلم قدر يدخلنا في منتصف الأحداث من البداية، وده جعلنا نشعر أن الفيلم أبعد ما يكون عن الملل، وبشكل عام قدرنا (نتورط) مع الأبطال في الأحداث وده شيء يحسب للسيناريو القوي وللإخراج اللي قدر يحقق المطلوب منه.

أما حوار الفيلم فشعرنا فيه ببعض المبالغة في بعض المشاهد وحسينا أنه حوار مش حقيقي في بعض المشاهد يعني من الصعب إننا نشوف الحوار ده في حياتنا اليومية الحقيقية.

الديكورات والموسيقى والأزياء

ديكورات الفيلم كانت قوية وواضح فيها البذخ الإنتاجي، لكن الموسيقى كانت ضعيفة وغير مؤثرة وغير واضحة في سياق الأحداث. على العكس من الملابس واللي عبرت عن الشخصيات وتدرجها بين الفقر والغنى، وقدرت الأزياء تلعب الدور المطلوب منها في الأحداث بالظبط.

الخلاصة

على الرغم من طرح عمر الأزرق وسمكة وصنارة في السينمات، لكن في رأينا أن الجمهور الحقيقي للأفلام هيبدأ في التوافد عليها مع بداية عيد الأضحى بشكل فعلي ومش قبل كده.

علشان تبقى عارف:

بطل عمر الأزرق نضال الشافعي شارك قبل كده في بطولة فيلم إبراهيم الأبيض أمام النجم أحمد السقا.