The Definitive Guide to Living in the Capital , Cairo , Egypt

أفلام
عنتر ابن ابن ابن ابن شداد

عنتر ابن ابن ابن ابن شداد: جرس إنذار لمحمد هنيدي

  • إيمان السيدباسم سمرة...
  • كوميدي
  • شريف إسماعيل
  • في1 Cinema
تم التقييم بواسطة
Mohamed Hamdy
قيم
قيم الآن
عنتر ابن ابن ابن ابن شداد: جرس إنذار لمحمد هنيدي

على الرغم من أن الجمهور كان متعطش لفيلم كوميدي في العيد بعد جرعة الأكشن اللي قدمها محمد رمضان في جواب اعتقال وأحمد السقا في هروب اضطراري، إلا أن محمد هنيدي فشل في سد العجز ده.

 

 

القصة

الفيلم بيحكي عن شاب ضعيف جسديًا (هنيدي) بيكتشف أنه منحدر من سلالة عنتر بن شداد، الأمر اللي بيخلق حالة من المواقف الكوميدية -أو اللي المفروض تبقى كوميدية- مع استمرار الأحداث.

فريق العمل

شارك في بطولة الفيلم درة وباسم سمرة وحمدي الميرغني ومحمد ثروت وغيرهم من الفنانين، لكن على الرغم من فريق العمل القوي اللي شارك في الأحداث، إلا إن النتيجة النهائية كانت ضعيفة وغير مؤثرة.

تأليف الفيلم كان مهمة أيمن بهجت قمر والفكرة  لصادق شرشر أما الإخراج فكان من نصيب شريف إسماعيل.

الأداء التمثيلي

الأداء التمثيلي لمحمد هنيدي جاء بدون أي تجديد على أي صعيد، وقدم لنا نفس الشخصية اللي قدمها هنيدي في 99% من أفلامه تقريبًا، وفى رأينا إن هنيدي لازم يشتغل أكتر على نفسه كممثل، علشان زمن الشخصيات الواحدة انتهى وتجربة محمد سعد خير إثبات على ده.

باسم سمرة يعتبر الحسنة الوحيدة في الفيلم واللي حسينا معاه ببعض الكوميديا، أما درة فكان وجودها مجرد سد لخانة البطولة النسائية وواضح أنها كانت عارفة ده كويس ولم تبذل أي مجهود تمثيلي يذكر.

السيناريو والحوار والإخراج

سيناريو الفيلم كان ضعيف وحسينا فيه بكتير من الاستسهال، أما عبء الكوميديا بالكامل فكان على عاتق الحوار اللي ماقدرش يسد المهمة دي وضحكنا بالكاد على مشهدين أو تلاتة من الفيلم. أما الإخراج فطاله هو كمان الاستسهال والاستعجال للحاق بموسم العيد.

الموسيقى والديكورات والملابس

يمكن دي الحسنة الوحيدة للفيلم واللي تمثلت في اختيار أماكن التصوير والديكورات المميزة اللي قدمت في النهاية صورة جيده على الشاشة.

حركة الكاميرا كانت انسيابية والاستايلست كان شايف شغله وقدم ملابس متناسبة مع طبيعة القصة والأحداث.

الخلاصة

عنتر ابن ابن ابن ابن شداد مش أقوى فيلم كوميدي ممكن نشوفه لهنيدي، وهنيدي محتاج يعرف إن الوصول للقمة من جديد محتاج أكتر من كده.

علشان تبقى عارف:

الفيلم يعتبر ثاني تعاون بين أيمن بهجت قمر ومحمد هنيدي بعد فيلم عندليب الدقي.

عجبك ؟ جرب

فول الصين العظيم

نصيحة 360

كان من المقرر أن يقوم أحمد المهدي بمهمة إخراج الفيلم، لكنه اعتذر وحل محله شريف إسماعيل.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح