The Definitive Guide to Living in the Capital , Cairo , Egypt

بنحب ونحترم الأفلام العربية اللي بتقدم حبكة جيدة، واللي بتقوم بمجهود واضح لتقديم سينما محترمة. ونقصد بالأحترام هنا احترام المشاهد وعقليته وقدرته على الاستيعاب، حتى لو كانت الأفلام دي نفسها مش كاملة. وده اللي ينطبق على فيلم عيار ناري.

عيار ناري بيحكي عن الطبيب الشرعي ياسين المانسترلي (قام بالدور أحمد الفيشاوي) واللي بيكتب تقرير تشريح لواحدة من الجثث اللي تم العثور عليها بعد المصادمات بين المتظاهرين وقوات الأمن. لكن بعد التشريح وكتابة التقرير بيكتشف الدكتور أن الجثة تم إطلاق النار عليها من مسافة قريبة عكس باقي الضحايا.

ومع تسريب التقرير للصحافة بتنقلب حياة الطبيب بعد التشكيك في سمعته من مديرة المشرحة (صفاء الطوخي)، الأمر اللي بيخليه يحاول يعرف الحقيقة من خلال التعامل مع أسرة القتيل (قام بدوره أحمد مالك).

المميز في فيلم عيار ناري هو أنه بيناقش جزء فلسفي مهم. هو: هل الحقيقة دايمًا لها وجه واحد؟ وهل أصلًا فيه حاجه أسمها (الحقيقة المطلقة)؟ ولا كل واحد فينا بيعرف الحقيقة من وجهة نظره؟

المميز كمان في الفيلم أن الجانب الفلسفي ده مش بيأثر على باقي جوانب الفيلم. لكن بالنسبة للقصة اللي كتبها هيثم دبور. كنا نتوقع أن جانب الحركة يكون له الغلبة على الجانب الفلسفي. علشان كده اللي هيتفرج على الفيلم كفيلم أكشن فقط ممكن يشعر بالإحباط. خاصة أن تقديم الشخصيات في الفيلم كان نمطي جدًا خاصة شخصية الصحفية مها عوني اللي قامت بدورها الفنانة والمطربة روبي.

بالنظر الى أن الفيلم هو التجربة الإخراجية الطويلة الأولى للمخرج كريم الشناوي نقدر نقول أن كريم قدر يدير فريق العمل باحترافية كبيرة ويخرج بأداء مميز منهم. مع بعض التعثر في مونتاج بعض المشاهد أو الأنتقال بين بعض المشاهد. لكن التجربة الأولى دايمًا بيكون لها أخطاء نقدر نتفهمها.

بالنسبة للأداء التمثيلي كنا نتمنى القصة ما تحطش الشخصيات في قوالب نمطية تأثر على أدائهم التمثيلي. لكن للأسف كل شخصيات الفيلم تقريبًا كانت بتدور في فلك من النمطية اللي أثرت في النهاية على تقبل المشاهدين لهم. لكن كالعادة محمد ممدوح قدر يقدم أداء متميز جدًا، ولا نقدر ننسى مشاركة الجميلة أسماء أبو اليزيد في دور سلمى واللي بتثبت لنا يوم بعد يوم أن لها مستقبل سينمائي مبهر.

عيار ناري مش أفضل فيلم فلسفي أو فيلم أكشن نشوفه. لكنه محاولة جادة ومحترمة للخروج من القوالب النمطية للأعمال السينمائية.

علشان تبقى عارف: تم عرض الفيلم من خلال فعاليات مهرجان الجونة السينمائي الفني.