المتخصصين في علم النفس والاجتماع بيقولوا إن نسبة الإصابة بالخوف المرضي أو الفوبيا بيزيد مع تقدم المجتمعات وظهور عناصر وتقنيات حديثة زي المصاعد أو الأماكن محكمة الغلق أو المباني شاهقة الارتفاع.. إلخ.
وعلى الرغم من وجود أعمال كتير بتناقش موضوع الفوبيا والأمراض النفسية بشكل عام، لكن قليل لما شوفنا فيلم عربي بيركز في كل تفاصيله على الموضوع ده. وده اللي حاول صناع فوبيا يعملوه… وده اللي فشلوا فيه.. وعن جدارة!
فريق العمل
فيلم فوبيا من إخراج إبرام نشأت وهو مخرج أفلام ظرف صحي وعمود فقري! ومن تأليف خالد الشيباني، أما البطولة فكانت لرامي غيط وعمرو رمزي مع راندا البحيري وميرهان حسين والراحل أحمد راتب.
قصة الفيلم
بتدور أحداث فيلم فوبيا حول شابين مصابين بالفوبيا. وكل واحد فيهم الفوبيا بتاعته عكس التاني بنسبة 100% فواحد فيهم مصاب بفوبيا الوسوسة وحب النظام والنظافة والترتيب، أما الثاني فحياته عبارة عن كومة من عدم التنظيم والعشوائية التامة! الأمر اللي بينتج عنه كمية لا تنتهي من المواقف الكوميدية اللي المفروض تتفجر على مدار أحداث الفيلم.
القصة والسيناريو والحوار
على الرغم من أن القصة جيدة وجديدة، لكن كان ممكن تتنفذ أفضل من اللي شوفناه على الشاشة بكتير، كمان لاحظنا رغبة السيناريو في حشر عدد لا نهائي من المشاهد الكوميدية بدون أي ضرورة يعني كوميديا لمجرد الكوميديا مش لأن الأحداث محتاجة ده، ونفس الأمر تكرر مع الحوار، ودى كانت عوامل مهمة ساعدت على عدم إعجابنا بالفيلم على الإطلاق.
وضاع المجهود التمثيلي اللي حاول أبطال الفيلم يقوموا به في ظل ضياع باقي عناصر صناعة الفيلم زي ما شوفنا.
الإخراج والموسيقى والديكور
إخراج الفيلم لإبرام نشأت مشى على نفس خط السير لأفلامه السابقة، والنتيجة كانت ظهور الفيلم بنفس شكل أفلام إبرام السابقة.. مجرد تسابق على حشر كمية من الإيفيهات وسط خيط درامي ضعيف جدًا في محاولة لإضحاك الجمهور بأي شكل.
وطبعًا من الصعب إننا نتكلم عن الديكورات أو الموسيقى في فيلم فشل على الأقل في رسم البسمة على وجوه مشاهديه.
الخلاصة
فيلم فوبيا كان ممكن يكون أفضل لو كان الإخراج والسيناريو والحوار أفضل من اللي شوفناه على الشاشة!
علشان تبقى عارف:
تم طرح 4 أغاني خاصة بالفيلم في إطار حملة الترويج له.
أكتب تقييم
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
