The Definitive Guide to Living in the Capital , Cairo , Egypt

مبدئيًا احنا مش ضد الأفلام منخفضة الميزانية، أو اللي بيحاول الفنانين الشباب يقدموا فيها نفسهم للجمهور، وده لإننا عارفين إن السينما بمعناها التجاري الاحترافي ممكن تبقى صعبة على الشباب في بداية مشوارهم الفني.

لكن اللي إحنا ضده فعلًا هو حالة الاستهتار والاستسهال والاسترخاص اللي بنشوفها في كل تفصيلة من تفاصيل الفيلم، وده لو صح إننا نسمي “إنت إيه” فيلم أصلاً.

“إنت إيه” مقتبس عن الفيلم الهندي الشهير P.K بطولة “عامر خان” واللي بيقدم قصة كائن فضائي بينزل الأرض ويبدأ في طرح أسئلة تبدو بسيطة لكن في حقيقتها في عمق، وبتقدم أفكار فلسفية مهمة.

“إنت إيه” استوحي الإطار العام للقصة، لكنه لاقدم فلسفة ولا حتى قدم كوميديا، والحقيقة إن اللي شوفناه في النهاية عبارة عن خليط وحش جدًا من الدراما أو الكوميديا، لكنه فشل في تقديم أي حاجة منهم، حتى مع كل محاولات بطل الفيلم “إبرام سمير” إنه يكون كوميدي، وطبعًا ده بيحصل في ظل شبه غياب تام للمخرج اللي واضح إن أسلوبه في الإخراج كان معتمد على إنه يسيب كل ممثل يعمل اللي هو عاوزه بدون توجيه.

ولأن الفيلم منخفض أو ممكن نقول معدوم الميزانية، فكان في استعانة ببعض الممثلين علشان يسندوا الأداء الضعيف من إبرام، وياريتهم ماعملوا كده، علشان شوفنا “طاهر أبو ليلة” و”نرمين ماهر” وغيرهم في أسوأ حالاتهم السينمائية.