The Definitive Guide to Living in the Capital , Cairo , Egypt

فيلم الكويسين يعتبر واحد من الأمثلة على الأفلام الكوميدية النمطية اللي بدأت تبقى عادة في فترة الأعياد. وعلى الرغم من إقبال المشاهدين بشكل أكبر في الفترة الأخيرة على أفلام الأكشن إلا إن المنتجين مصممين إن الأفلام الكوميدية لازم تبقى هي اللي مسيطرة على موسم أفلام العيد.

(الكويسين) بيحكي عن عائلة الكويس. العائلة اللي كل موقف من مواقف حياتها بيتحول لمجموعة من المواقف الكوميدية اللي مش بتتوقف من بداية الفيلم لنهايته تقريبًا. والكوميديا في الفيلم بتتنوع ما بين كوميديا المواقف وكوميديا الإيفيه. وعلى الرغم من سيطرة كوميديا الإيفيه على منتصف الفيلم الأول تقريبًا، من بداية النصف الثاني قرر أيمن وتار مؤلف الفيلم التركيز على الكوميديا النابعة من المواقف بالشكل الأساسي. وده كان من القرارات الموفقة في الفيلم.

أحمد الجندي في موقع الإخراج قدم أداء جيد وغير متكلف. وحاول قدر الإمكان يقلل من تمدد السيناريو اللي أصابنا ببعض الملل خاصة في النصف الأول من الأحداث. وبشكل عام قدر الجندي يوظف إمكانيات أبطال الفيلم في أماكنها الصحيحة.

أداء أحمد فهمي لدور مظهر كويس كان عادي. وحسينا إن فهمي مش بيعمل أي مجهود علشان يقدم شخصية مختلفة عن باقي الشخصيات اللي قدمها في أعماله السابقة سواء الدرامية أو السينمائية.

عجبنا جدًا أدوار الفنانات الشابات أسماء أبو اليزيد و تارا عماد و جيلان علاء واللي قدرت كل واحدة منهن إنها تقدم أداء تمثيلي قوي ومختلف. وخاصة أسماء ابو اليزيد واللي فاكرين لها دورها المميز في مسلسل هذا المساء ومسلسل ليالي أوجيني. وأسماء من الفنانان الشابات اللي قدروا يثبتوا قدراتهم التمثيلية بقوة في الفترة الأخيرة. وبتمتاز بذكاء فني بيخليها تحدد الأعمال اللي تناسبها بغض النظر عن مساحة الدور.

حسين فهمي في دور “عارف كويس” بيثبت قدرته على العطاء والاستمرار في مجال بيحتاج طاقة وحيوية طوال الوقت. والحقيقة أن حسين فهمي من الممثلين المنتمين للجيل الذهبي القادر على العطاء الفني المستمر.. ودي نقطة تستحق الاحترام في حد ذاتها.

الكويسين فيلم كوميدي تقليدي من أفلام مواسم العيد. ننصح بمشاهدته لو عاوزين تفضوا دماغكم من أي حاجه لمدة حوالي ساعتين.

علشان تبقى عارف: أيمن وتار مؤلف الفيلم كتب بعض حلقات مسلسل الوصية اللي تم عرضه في رمضان الماضي. كمان كان واحد من فريق العمل في برنامج البرنامج مع باسم يوسف.