The Definitive Guide to Living in the Capital , Cairo , Egypt

أفلام
فوتوكوبي

فيلم فوتوكوبي: ماتضيعش عمرك في الانتظار

  • بيومي فؤادشيرين رضا...
  • دراما
  • تامر عشري
  • في1 Cinema
تم التقييم بواسطة
Mohamed Hamdy
قيم
قيم الآن
فيلم فوتوكوبي: ماتضيعش عمرك في الانتظار

الجميل في فيلم فوتوكوبي بالإضافة للإخراج الفيلم المميز والسيناريو المكتوب بعذوبة شديدة، هو الرسالة اللي بيحملها الفيلم للناس، والمتمثلة في عدم انتظار الحاجات اللي مش بهيجي لحياتهم، أو بتيجي متأخرة، والانطلاق في استكشاف العالم والاتصال بيه.

 

 

القصة

(فوتوكوبي) بيحكي عن (محمود) محمود حميدة صاحب مكتبة تصوير الأوراق وسايبر واللي بيتعرف على (صفية) شيرين رضا واللي بتعاني هي كمان من آلام المرض واللي بتبعدها لدرجة كبيرة عن الاختلاط بالناس. محمود بيبدأ في استكشاف الحياة من حواليه من أول وجديد بعد ما بيشعر إنه ضيع وقت كتير من عمره في انتظار حاجات مش بتيجي، خصوصًا بعد مساعدته في بحث لطالب عن انقراض الديناصورات وشعوره إنه واحد منهم!

فريق العمل

الفيلم من تأليف هيـثم دبـور، وإخراج تامر عشري، وبطولة محمود حميدة وشيرين رضا وبيومي فؤاد وأحمد داش وفرح يوسف.

الأداء التمثيلي

محمود حميدة قدم أداء تمثيلي مميز كعادته. والحقيقة أننا بنقف عاجزين لما بنتفرج على أداء محمود حميدة التمثيلي علشان في كل مرة بنشوفه فيها بنكتشف أبعاد جديدة ومختلفة ومتميزة بتخلينا نوصف كل ظهور جديد لحميدة على الشاشة بإنه أفضل ظهور قام به حتى الآن!

 

 

بالنسبة لشيرين رضا هي كمان بتظهر مساحات جديدة من أدائها التمثيلي، وبتلعب في منطقة عمرية ممكن تكون بعيدة نسبيًا عن سنها الحقيقي، وبالرغم من إن ده مش أول دور تعمل فيه كده زي فيلم “خارج الخدمة” واللي شاركها في بطولته أحمد الفيشاوي. لكن بنعتقد أن فيلم فوتوكوبي بسبب نجاحه الجماهيري هيفتح أمامها مساحات واسعة من الأداء التمثيلي لمناطق سنية مختلفة ولنوعية شخصيات مختلفة كمان.

أحمد داش واحد من الممثلين اللي هيبقى لهم شأن كبير في المستقبل القريب. داش بيقدر يقوم بأي شخصية يقوم بيها، سواء كان شاب من الطبقة المتوسطة زي ما شوفناه في مسلسل (سابع جار) مؤخرًا أو حتى ابن مشتت بين أب وأم مطلقين زي ما شوفناه في مسلسل (الطوفان). كل الأعمال دي تعرفنا أن أحمد داش وجه بتحبه الكاميرا وبتندمج معاه بسرعة، ناهيك إن كان عليه عبء كبير فيما يتعلق بالجزء الكوميدي في الفيلم.

بيومي فؤاد أخيرًا بيخرج من عباءة التمثيل الكوميدي وتقديم أدوار شبه بعضها، وأخيرًا بيقدم دور جاد بملامح قوية وصوت عالي نجح في تحريض المشاهدين على كراهيته وتقديم جانب الشر في الأحداث.

السيناريو والحوار والإخراج

سيناريو الفيلم بيتسم بالوضوح والمباشرة ودي ميزة مهمة في الفيلم، والوضوح ده مش معناه أبدا السطحية أو الاستسهال في الكتابة، بل على العكس السيناريو لعب بشكل كبير على توضيح دوافع ونوايا الشخصيات المختلفة على مدار الأحداث. والإخراج ساعد السيناريو وتكامل معاه علشان يقدموا للمشاهدين مشاهدة مكتملة ومفهومة على أبعاد مختلفة من التفكير خاصة إن ده أول إخراج فيلم كامل لتامر عشري واللي حاول يقدم قصة ناس حقيقة بمنتهى العذوبة وعيشنا جوه الحدوتة، وكمان نظرة سينمائية ممكن يتم تأويلها بأكتر من شكل وتقدر تمس المشاهدين على اختلاف شخصياتهم وأبعادهم وده أفضل وأمتع ما شاهدنا في الفيلم.

الديكورات والموسيقى والأزياء

ديكورات الفيلم كانت قوية ومميزة ومعبرة عن المستوى الاجتماعي والثقافي اللي عايش فيه أبطال الفيلم، كمان الموسيقي التصويرية كانت عارفة كويس قوي إمتى تعطينا مساحة للمشاهدة وإمتى تكون هي المسيطرة على المشهد.

الخلاصة

فوتوكوبي فيلم جميل ومتدفق وفيه لحظات من المشاعر القوية اللي من الصعب نقاوم دموعنا أمامها. ننصح بمشاهدته بتأني والاستمتاع بكل مشاهده.

علشان تبقى عارف:

الفنانة رزان مغربي تعتبر واحدة من أكثر المتحمسين للفيلم، عملت مداخلة هاتفية في أحد برامج الراديو وناشدت كل العرب مشاهدة فوتوكوبي في السينمات بعد حصوله على جائزة أحسن فيلم في مهرجان الجونة ودبي.

لو عاوزين تشوفوا حوار كايرو 360 مع مخرج فيلم فوتوكوبي تامر عشري اضغطوا هنا.

عجبك ؟ جرب

حار جاف صيفًا

نصيحة 360

الفيلم حاصل على منحة صندوق أفاق لسنة 2016 كمصدر لتمويله. وقدر يمثل مصر في الدورة الأولى لمهرجان الجونة السينمائي الدولي سنة 2017

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح