The Definitive Guide to Living in the Capital , Cairo , Egypt

في العادة مش بنقدر نمنع نفسنا عن الوقوع في حب الأفلام اللي بتدور أحداثها في ليلة واحدة، خاصةً لو كانت الأحداث بتدور في إطار الحركة والأكشن، وهو ده اللي قدمه لنا 21 Bridges.

فيلم 21 Bridge بيحكي عن رجل الشرطة “أندريه دافيس” واللي قام بدوره “شادويك بوسيمان” واللي بيخش في صراع مع الزمن علشان يقبض على مجموعة من المجرمين قاموا بعملية سطو مسلح وقتلوا فيها رجال شرطة.

رحلة البحث عن الجناة مش بس بتاخدنا في جولة مختلفة في مدينة نيويورك، لكن كمان بتدخلنا في جوانب مختلفة ومظلمة في نفسية أبطالنا.

في النهاية حسينا إن الفيلم من ناحية السيناريو مشتت مابين محاولة إنه يقدم مشاهد أكشن وعنف، وبين إنه يقدم أحداث تشويق وإثارة، وفي النهاية خرج الفيلم على إيد المخرج “بريان كيرك” بمحاولات ضعيفة على الناحيتين.

الأداء التمثيلي لـ “شادويك بوسيمان” كان مميز الحقيقة، وكان جميل إننا نشوفه بره شخصية “الفهد” اللي بيلعبها في سلسلة أفلام Black Panther، والحقيقة إن “بوسيمان” قدر يقدم دوره المركب بشكل جيد ويقنعنا بالشخصية لدرجة كبيرة.

وعلى الرغم من محاولة الفيلم تقديم صورة مختلفة عن نيويورك بدون تزويق مبالغ فيه أو تقليل كبير من شأن المدينة، لكن ماشوفناش اهتمام كبير باللقطات أو المشاهد بالزاوية الواسعة أو المشاهد البانورامية للمدينة، على العكس في الاهتمام بإخراج مشاهد الأكشن والأشتباك واللي لازم نأكد على إنها دموية جدًا ومش هتناسب كل المشاهدين.