The Definitive Guide to Living in the Capital , Cairo , Egypt

مشكلة أساسية كانت بتواجهنا في عدد كبير من الأفلام الموسيقية، وهي أن القصة فيها بتكون مجرد خلفية علشان يتم تقديم مجموعة من الأغاني أو الاستعراضات على مدار زمن الفيلم. لكن في حالة A Star Is Born القصة كانت قوية. والسيناريو كان واقف وجهًا لوجه أمام الأغاني والاستعراضات. لكن هل ده كان أكبر تحدي بيواجهه صناع الفيلم؟

الحقيقة أن أكبر صراعات فيلم A Star Is Born كانت أنه تم تقديم نفس القصة بأكتر من معالجة. على سبيل المثال سنة 1937 و 1954 و 1976. يعني المشاهدين اللي بيشوفو الفيلم عارفين هم بيتفرجوا على إيه. لكن الجديد بيكون دائمًا في الأغاني والأداء التمثيلي. لكن هل قدروا صناع نسخة 2018 من الفيلم يتفوقوا على النسخ السابقة؟

هو ده التحدي اللي أخده على نفسه برادلي كوبر واللي تولى إخراج الفيلم في أولى تجاربه. كوبر كمان هو المؤلف والبطل. يعني نقدر نقول أنه أخد الفيلم كتحدي شخصي بالنسبة له. والحقيقة أنه قدر يقدم أداء تمثيلي وإخراجي متميز. هيخلينا نضعه في ذاكرتنا كأداء ممتاز على كافة الأصعدة.

وعلشان إحنا بنتكلم عن فيلم غنائي قوي. كان لازم يشارك في البطولة واحدة من أهم الأسماء وأكثرها تأثيرًا في مجال صناعة الأغنية في أمريكا والعالم. ليدي جاجا اللي قدرت تخطف البطولة من أسماء بحجم بيونسيه وجنيفر لوبيز و اسبرانزا سبالدينج واللي أشيع أنهم كانوا مرشحين للقيام بدور البطولة أمام كوبر.

الفيلم بيحكي عن مطرب مشهور بيبدأ نجمه في الخفوت مع معاناته من مشكلات مع إدمان الخمور. لكنه بيتمسك بفرصة أخيرة للعودة للشهرة لما بيقرر يتبنى موهبة فتاة شابة علشان يقدمها للجمهور ويعيد تقديم نفسه واكتشافها من جديد من خلاله. ولا يمكن ننسى قصة الحب اللي بتتولد بين الأثنين. والصعوبات اللي بيقعوا فيها مهنيًا وشخصيًا وعاطفيًا.

من أجمل الأمور اللي لفتت أنتباهنا في الفيلم هي الأغاني واختياراتها، وتوظيفها دراميا على مدار الأحداث. كمان استخدام زوايا التصوير والإضاءة كانت مميزة جدًا. ومن الواضح أن تحدي برادلي كوبر مع نفسه قدر يحسمه لصالحه. وده واضح حتى من بعض الأراء النقدية المميزة عن الفيلم.

فيلم  A Star Is Born فيلم غنائي رومانسي قوي ومميز. هينافس بقوة النسخ السابقة من نفس الفيلم. ننصحكم بمشاهدته.

على الهامش.. غلطة صغيرة وقعت فيها إحدى السينمات في مصر. لما كتبت كلمة Born بشكل غلط على تذاكر السينما. الأمر اللي وقعهم ضحية سخرية ناس كتير منهم الفنان الشهير عباس أبو الحسن.

علشان تبقى عارف: أعرب المخرجان الكبيران (ستيفن سبيلبرج) و(كلينت إيستوود) عن اهتمامهم بإخراج الفيلم، لكن في النهاية الإخراج راح لـ (برادلي كوبر).