The Definitive Guide to Living in the Capital , Cairo , Egypt

لما نتكلم عن أفلام الفضاء، أول حاجة هتيجي في بالنا هي مشاهد التشويق في فيلم Interstellar أو سلسة أفلام Star Wars، لكن في فيلم Ad Astra بنشوف عالم الفضاء بشكل مختلف شوية.

الفيلم بيحكي عن روي مكبرايد واللي بيقوم بدوره النجم (براد بيت) اللي بيتم تكليفه بمهمة فضائية هدفها الوصول لوالده رجل الفضاء الشهير كليفورد واللي بيقوم بدوره النجم (تومي لي جونز) وتوصيل رسالة في غاية السرية له في عالم بتدور أحداثه في المستقبل القريب، لما بيتحول جزء من القمر مثلاً لجزء مأهول بالسكان، وفيه محلات بشكل عادي وطبيعي زي كوكب الأرض.

لو كنت هتتفرج على الفيلم ومتوقع لقطات أكشن وحركة زي Interstellar مثلاً يبقى ماننصحكش، وده لإن المخرج (جيمس جراي) قدم أداء هادي جدًا في رسم الأحداث على الشاشة، حتى إنكم ممكن تحسوا بالملل في أجزاء كبيرة من الأحداث، حتى المواقف المؤثرة عددها قليل في فيلم مدته حوالي ساعتين.

لكن اللي يهون الإيقاع البطىء نسبيًا للفيلم هو الأداء التمثيلي، خاصةً (براد بيت) اللي قدم واحد من أحسن أداءاته في الفترة الأخيرة، وبشكل عام واضح إن (بيت) مركز جدًا في اختياراته في الفترة الأخيرة، وسبق وقدم أداء جيد في Once Upon a Time.. in Hollywood وأداؤه في Ad Astra لا يقل أهمية وقوة.

من عوامل قوة الفيلم كمان اللي ممكن نتكلم عنها هي أسلوب التصوير اللي بيفكرنا بالجيل الذهبي للسينما الأمريكية في الثمانينيات، ومن الواضح إن (جيمس جراي) بيلعب بالأسلوب التقليدي في إخراج أعماله السينمائية.