The Definitive Guide to Living in the Capital , Cairo , Egypt

حالة من الترقب الشديد صاحبت تقديم فيلم Amityville The Awakening للسينمات. مش بسبب جرعة مشاهد الرعب أو ترقب الناس للنوعية دي من الأفلام، لكن بسبب أن ده أول الأفلام اللي تقدمها ستوديوهات Weinstein بعد فضيحة هارفي وانستين الخاصة بالتحرشات الجنسية واللي تسببت في زعزعة أفلام الشركة ومركزها في السوق.

القصة

فيلم Amityville The Awakening بيحكي عن أم عايشة لوحدها مع أطفالها، وبتضطر تنتقل بيهم لمنزل مسكون بالأشباح، كحل أخير علشان تقدر تعالج ابنها، لكن الأمور بتخرج عن السيطرة وبيتحول الأمر من محاولة للشفاء لمحاولة للنجاة بأرواحهم وعقولهم.

فريق العمل

الفيلم من تأليف وإخراج فرانك كالفون ومن بطولة هانتر جوليجوسكي ومكينا جرايس وبريان بريتر وتوماس مان وكيرتووود سميث.

الأداء التمثيلي

في الغالب مش بنحتاج نشوف أداء تمثيلي مبهر في أفلام الرعب، لإن المطلوب من الممثلين عادة بيكون إظهار الرعب والهلع في العيون والتصرفات، لكن لازم نقول أن الأداء التمثيلي ل جينيفر جيسون لي وبيلا ثورن كان مميز وقدر يعيشنا في السياق العام للأحداث بشكل رائع جدًا.

السيناريو والحوار والإخراج

سيناريو الفيلم بسيط وبيسير في اتجاه واحد بدون تعقيد، وتم الأعتماد على الحوار علشان ينقل لنا مشاعر الأبطال بشكل كبير، أما الإخراج فوقع عليه العبء علشان يقدم لنا مشاهد الرعب بشكل قوي ومميز، والحقيقة أن الإخراج نجح في مهمته لكن ما حسيناش أننا وصلنا لمرحلة الهلع. لكن كشعور بالرعب لازم نعترف أن بعض المشاهد فعلًا كانت مرعبة للغاية.

الديكورات والموسيقى والأزياء

ديكورات الفيلم كانت أكتر من رائعة، وقدرت تجسد لنا الإحساس بالإقامة في منزل مسكون، كمان الموسيقى التصويرية والمؤثرات الخاصة لعبت دور مهم جدًا في زيادة جرعة الرعب في الفيلم.

الخلاصة

فيلم Amityville The Awakening مش أفضل أو أقوى فيلم رعب شوفناه في حياتنا، لكنه فيلم مناسب جدًا لعشاق النوعية دي من الأفلام، ولمحبي أفلام المنازل المسكونة على الخصوص.

علشان تبقى عارف:

تقييم الفيلم على موقع IMDB 4.9 من 10.